Thumasa
Hun hongpai zel in Khristmas hong naih mahmah nawn ta, himahleh kum dang bang a zat theih ahi diam chih i thei naikei. Kum dang bang hileh tuhun, inn chei hun, biakinn chei hun ahi a, inn kong a star tak khiak hun ahi ta. Himahleh natna hipi ziak in tuni tan, bang chi bang in i zang dia chih kuaman i gen thei naikei uhi. Khristmas a nite Pathian hehpihna a, i muh i lamen himahleh kum dang toh teh in, chituamna khat hong nei di’n a gintak huai hi. Hiai bang hun ah lungtang a kisakkholna poimoh ahihdan i sutsuk ding.
1. Pathian bangchi bang a kisakhol hiam?
Galatia 4:4-5 “Himahleh a hunbi a hong kim in, Pathian in a Tapa, numei suan a, dan nuai a hong piang tuh dan nuai a omte tatkhiak a om a, ta hihna bukim i tan theih nading un, a hon sawlkheta hi”. Pathian naktak in kisakhol a, khovel mite poimoh huntak in hong piangsak hi. Pathian lungtang kia hilou in khovel vai ah leng thupitak in kisakkholna a nei hi, huaite i ensuk ding:
a). Political lam ah: Rome ten khovel ah lampi tampi leh lam hoih tampi a sial uh a, kivaihawmna hoihtak nei in lemna leh muanna toh vai a hawm uhi.
b). Cultural lam ah: Khovel naktak a khang in, miten lai lam ah khantouhna nasatak nei in Greek leh Latin pau a thei uhi. Mivantang in Koine Greek (Thukhun thak kigelhna pau) a pauthei uhi.
c). Spritual lam ah: Khovel a kilamdang a, Greek leh Roman Polytheism (pathian tampi om chih gintakna) apan in secular philosophies (khovel pilna leh ngaihtuahna) leh Emperor worship (kumpite biakna) in a kikheng hi. Judate lakah Baptispa Johan tungtawn in halhthakna tung a, Laisiangthou a lunglutna thak a nei uhi. Hiai huntak in khovel mite lungtang a kihong mahmah, hiai huntak in Jesu Khrist khovel ah hongpai hi.
Pathian naktak a kisakhol ahihdan hon musak hi “a hunbi a hong kim in…” Pathian in pumpi leh lungtang in kisakkholna nei a, pumpi a kisakkholna leilam vai ah (en in: a,b) chiantak in kimu hi. Hiai Pathian kisakkholna in tuni tanpha in gen neilai a, Sawltak Paul in hiai hun alampite zang phatuam mahmah hi. Miten khalam vai a taksap a neih huntak un, Pathian in Jesu Khrist leitung ah hongpiang sak a, huai ziak tak in tunitan lungtang kihongte tungah Pathian in nasem tou den hi.
2. 25 December Jesu Khrist pianni a lom ding mo ahihkeileh zang ding?
Judaten belam ching hun a nei ua, a tangpi in phalbi khovot lak ah belamte a chingkhe kei ua himahleh nipi hun in ahihleh a chingkhe zel uhi. Luka 2: 8-20 ah belam chingte belam chinna mun ah angel kilak ahihmah in, hiai hun phalbi lai hilou ding ahi akichi hi. Himahleh ani diktak thei a om tuan kei, Pathian a ni leh a hunte a lunglut lou chihna ahi. 25th December Jesu pianni a i zat Pathian hun seh mah ahi dia aw chih ngaihsutna hon pethei a, a ziak ahihleh December awllen hun, louneite kum khat nasep a gah muh hun, siamsinte khawl hun, hun awlzat hun ahi a, hun awl zat i chih siatna bulpi khat ahihman in, hiai huntak a Khristmas i zat Pathian hun seh ahi diam chih hon ngaihtuahsak hi. Hiai ni biakinn zuan ngeiloute biakinn zotni, kikhom tam ni, biakinn a huntam zatna ni ahi. Hiai 25th December Khristmas ni a ding a kisakkholhna in hun kizang a hiai in tuailai tampi siat ding dal ahih diam chih hon ngaihtuahsak hi.
25th December Khristmas ni a zang lou hilehang siatna tua sang in a uangzaw diam chih ngaihsutna a lian zaw hi.
Rome Kumpi Constantine in 336 AD in Rome a Khristian a khang dungzui in Saturnalia (Rome milim pathian, nisa pathian pianni) pen Jesu Khrist pianni a zat ding in ana puangkhia a, tunitan in hiai khovel pumpi a mitamzaw ten kizang tou den hi. Rome mite a ding in milim pathian apan vualzohna leh zalenna khat hi ahi.
25th December Jesu Khrist pianni a zat ding ahi kei a, hong piang ahi chih thei gigena a zat ding ahi. Hiai in taksa a hongpiang na a taktak ahi chih hon theisak hi.
Jesu Khrist pianni a i zat leh zang khial ding ihi, a nop bawlna kia in lungsim a la ding a, Jesu Khrist lam ngaihsutna a tom ding hi. Hun dang in nekkhomnate bawl in nuamtaktak in hun i zang a , himahleh tuhun in khovel natna hipi ziak in bang chi bang in i zang dia chih gen thei a om naikei. Khenkhat in biakinn sese a zat ding, nekkhomna bawl teitei ding chih ngaihsutna i nei maithei himahleh huaite a thupi pen hilou ahi. A thupi penpen zaw lungtang a Jesu Khrist piang sak ding ahi. I zatna munmun biakinn ah i zang hia, innsung ah i zang hia, i zatna munmun ah Pathian in ei a dia Jesu Khrist khelhna ngaihdamna ding a honpiak, naungek a hongpiang a, haksatna tampi hong thuak, khualbuk tanglou a, bawngbuk a bawng anpiakna kuang a sial a om ka thei gige uh Toupa, chi in kipahthu genna hun in zang ni.
Thukhitna: Khovel vai a Pathian kisakkholhna in tunitan in gen a nei a, tunitan huai hun a khovel khantouh dan in phattuamna a nei tou den hi. Khalam vai a kisakkholhna in tunitan in mite lungtang a nasem a, mite hinna thak leh lametna thak guan hi. Khristmas hunzat a nuam penpen, biakinn a zat, nekkhomna bawl leh lengkhop chihte ahi. Himahleh huaite sang poimoh zaw, a zang tupen lungtang ahi. Salam vai a kisakholhna sangmah in lungtang a kisakkholhna ahi Pathian in a deih, tuhun a kipan lungtang hong a, lungtang mah toh zat Pathian in a deih hi. I om na munmun, i zatna munmun ah lungtang kihongtak a i zat ahi Pathian in a deih penpen, huai ngaihtuahna nei a zang chiat thei ding in Toupan honvualzawl hen!
Leave a Reply