Sihna leh hinna tung a thunei Pathian ahi chih i Laisiangthou hon sinsak leh Pathian gen a dik mah ahi. Himahleh, Covid 19 hipi i lak ah hong tun a, a hon tuam a; a hon nuai tak in ei gingtu kichite’n i bitna Pathian khut a omlou mah i bangsak dek i bang maimah uhi. Covid positive ziak hiam sihna a hong om chiang in, sahkhua heutu leh makai khenkhat-te nasan in Pathian theihpih a thiltung ahi; Pathian in hun a sa ta a ahi chi ahon khamuanding i sak lai in, i pilvanlouhman uh ahi. I kikepsiamlouh man uh ahi, SOP i zuihlouh ziak uh ahi chinuam ngen in i om maimah uhi. Huchia i kikep siamlouh ziak leh pilvan zawhlouh ziak bang, SOP i zuih zawhlouh ziak a natna vei a si i hih in tuh sihna leh hinna tung a thunei Pathian hikhalou chihna a hongsuak ding a, eimah kithuneihkhum chihna suak ding hi. Huai tuh Bible hon sinsakna tawh kikalh ahi hi.
Kuapeuh hiai natna vei ut a, si ut ki-omlou ding hi. Himahleh, mi tampite’n kiveikha hi. Tua hun chiang in mi tampite’n patauhna leh thawmhauna nei in i natna veikhakna leh i lakkhakna ding kisui chiat in, kilunggim mahmah hi. Tua hun ah, Pathian in ka tuahding ahon phal ziak atuak ka hi kichi theilou mawk a, ngohding kizong vek hi. Hiai in gingtute i kisinsakna- muanna i koihna ding i kikokmuh dan etthak ding om diam dotna poimawh mahmah ahi. Unau gingtu khat i hihleh tuabang lungsimput i neihlouh ding ahi. Hiai natna veikha in i si khata zong in Pathian hon phal bangbang kituak ahizaw a, mihing kiven abitzou ding kuamah ki-omlou hizaw hi. Gingtu i hihleh Pathian a thilbangkim i koih ngamna leh bitna ding a, amah a kingakngamna; amah min ziak a bangkim phutngamna tuh GINNA a na hi hi.
Kumpipa himhim sepaih tam ziak lel a humbit ahi ngei kei: mihat thahat ziak lel a tatkhiak ahi sam kei.Bitna di’n sakol bangmah ahi kei: a hat mahmah ziak lel in kuamah a humbit tuan kei ding hi. Ngai dih, Toupa mit tuh amah laudan siamte tung ah a tu gige a, a chitna lam ente tung ah. A hinna uh sihna lak a humbit ding leh kial tun a amau tunghing ding in. – Sam 33:16-19
Belampu/heutu khat i hihna ah khawvel lam heutute’n covid natna a bitna ding in zuihding a hon bawl uh a, mipi kithuahkhawmna leh Biakinnte khakding thu a hon pia uh a, thumangtak in i bitna ding in i belamte i zuihpih uh a, Biakkhawmna innte i khak uhi. Himahleh, khawvel thil leh Politician khat peuhpeuh te’n Programme ahon bawl chiang un lah, ‘ka hong tel theikei ding’, chi nuam omlou in chial khak a om peuhmahte’n Belampu Pastor/ Upa ka hi a, covid ziak a govt thupiak zui a Biakinn khak ka hi chih kitheihmawh bawl in, tua hun ah covid vei ding leng laulou mahbang in i vatel zel uhi.
Covid 19 veikhak a sihding i lau mahmah ua, himahleh tangtawn sihna lah i lauh hetkei zel uhi. Pathian in lah hiai natnate ahong omding him ahi ana chi a, hiai natnate leh a mulkimhuai thil hongtungte ziak a patau a, i tangtawn munding gelfel ding ahon warningna lah ahi ngal a. Hilehleng eilawi in hiai natna akipan a kiven a, a pumpelhna ding lam ngen i kikawkmuh uhi. Tangtawn mun gelfel ding a kivei taktak a ki-awlmohtak a, khitui tawh thumna kineih khum chihte tawm mahmah zel hi. Tua hun a khamangthangte vei a, thum a a kap tawh chialpina bawl a, kisanding hileh kilawm hinapi in, inn a kikhum ding potlouh ding mah i buaipih pen uh ana hichiatzel hi. Kha mangthang man ding; Pathian gam a khamangthang tampi pilut ding chih gingtute’ mawhpuakna ahi ngal a, himahleh eite’n i mawhpuakna zohlouh khak ding lauhna tawh covid ziak a mi tampi a sih uh a a manthat khak ding uh lauh a i kisanding uh hizaw ding hinapi in Covid vei louhna dia potlouh a inn a kikhum a hiai natna a bitding chih i thupi pen uh ana hizel hi. I Toupa Jesu hon sinsakdan in hiai haksatnate maituahding a kisakding ana hizaw hi. Tuhun haksa ah ei gingtute’n Pathian a muanna i koihding ahihlai in khawvel vaihawm mipilte a bitna i zongzaw i bang maimah uhi. Toupa Sepaih muanhuai ding a kipia ei gingtute’n tangtawn sihna a tampi alut kha ding uh chih lauh sang in covid kilawhsawn khakding kinak veng zaw i bang maimah uhi. Tuhun haksa ah i ginna, i kingakna, i muanna koihna bang ahi a chih Toupa sepaih ei gingtute i ki-etchet mahmah uh a poimawh hi.
Ginna ah na omna uh hiam chih noumau ngeingei ki-en chian zel un. Ahihkeileh, noumau ah Jesu Khrist a om chih noumau ngeingei in na thei chian kei ua hia? deihlouh na hih kei ngal uh leh. – 2 Korinte:13:5
Gingtu khat i hihna ah kam kia a gensiam thoh pen Pathian ading in bangmah gen a neikei hi. I gingtu hinkhua ah Pathian a ding a mi gin-om, Pathian a muanna koih mi i hihleh i hihlouh i hinkhua leh i gamtat khawhei in ahon pulak hi.
KHA MANGTHANG KHAT COVID 19 NATNA AH HUN KHEZOU IN VENG BITZOU MAHLEHANG, A KHA TANGTAWN SIHNA AKIPAN I HUTKHAK ZAWH KEI LEH A LAWHSAM KIHIZAW HI. Pathian mai ah bang i gen ding ua?
KHA MANGTHANG KHAT COVID 19 VALAWH IN, HIAI NATNA AH SI MAHLEH A KHA SIHNA A KIPAN HUNKHIA A TANGTAWN HINNA A I PILUT ZAWH LEH A LAWHCHING KIHI ZAW HI. Pathian mai ah kimaitang mahmah ding hi.
Covid 19 a bit sang in tangtawn hinna nei a, sih khamuanna neih apoimawh zaw hi. Covid 19 lau a taitai sang in i maituah ding a, i tangtawn munding gelfelsa a om a maituahding a kisak kholh a pilhuaizaw hi.
BELAM PUTE DING IN: Hiai covid 19 a i belamte tampi suahtak sak a, khalam ah tampi khahsuah leh; Covid a tampi khak suah a, tangtawn hinna a tampi pilut ding, koipen tel huaizaw ding hiam.? Mihing pahtak leh Pathian pahtak koipen tel huaizaw ding hiam? chih mah ana kidong chiat in, mahni a thupukna la a i belamte pi mai ding ahi chih poimawhta hi. chih maimah na khawvel ah i ding chiat ta uhi..
HUAIZIAK IN TULAI TAK A PATHIAN GAMNA SEPNA A POIMAWH TUH MIPIL MISIAM, DEGREE SANGPIPI NEIH AHI KEI A, HAUHSAK LEH ZAWN THU LENG AHI KEI A, GINNA A MIHANGSAN AHI HI.
Leave a Reply