COVID-19 LEH KHAMUANNA | Gelhtu – Mung Phaipi

Amasa in simtute tengteng chibai!.
Thugelh siam hi hetkei mahleng, a changin ngaihtuahna bang avak dundun ton a omthei teisam hi. Tuni in Covid-19 boruak kawmkar ah hichi’n ngaihtuahna hon gelhkhe suk berbuar mok leng ka hon chi ahi.

Tuni in mihing khata piangkhe na nana chu kipaka lungnuam thei, leng lungngai thei, dah leh lungkham thei ding a siam mah ihi uhi. Huai banga ngaihtuah na neitheiloute mihingte laka leng a bukimlou chihna ahi zaw hi. Pathian in mihingte iit dan leh awlmoh dan kibang in hon kema, deihsaktuam neilou a hon etkolte ihi uhi. A vualzawlna kibang nisa, vuahzu-daikai, diik ding huihsiang leh a dangdang tanpha in akibang in hon musak-in tangsak a, huai tuh Pathian’ deihsaktuam neilou ahihna a kilatna te ahi pah hi. Hichia deihsaktuam neilou ahi i chih lailai in, mi khenkhat hihtheihna tuam biik nei leh ana vou zodeuh bel i om a, huai tuh i pianken hamphatna ahi a chih theih ding hi. Huaiziakin mihingte teng theihna kibang hiam, hihtheihna kibang hiam leh i pil-i-siamdan kibang vek hi mawk taleh tengkhawm theilou ding I na hi zo daih uhi. I tenkhawm dialdial theihna uh tuh i hihtheihna tuamtuamte uh ziak leng a hong hi pah mai hi, kuapeuh ki poimoh tuah chiat ihiman un. Miteng in hihna leh hihtheihna kibang lou leh tuam i nei chiat uhi. Tuni in mihingte hihna hiam a hihtheihna uh lampang gen sawm ihi zo kei a, I khamuana Pathian a dia muanhuai leh muantaak-a om apoimoh dan gen ut ihi. Na lungngaih a na mangbat hun in kua na beel hiam? kua kiang na zuan in, huai nava zotna pen kiangah khamuanna tak na mu hiam? chih ki dong le kachi ahi.
A sakmin piandang michih lungsuang a luah “Covid-19” I chihchih uh a hong minthang khiak nung kumkhat bang a ching thei ta a, eilak mahmah ah leng bangzah hiam ten hinna I na taan ta ua, a lauthei mahmah lou-te bang in leng lauhguk na chiang nei theita hi’n theihtheih in om hi. Huchi kawnkar ah i lau in i lungkham dia i mangbang ding ka chihna ahi pah keia, himahleh patau theilou mok ihih lailai leh bel kingaihtuah zek ngai hi zaw kha ding ihi. Khovel pumpi in buaia a buaipih lai ua en va ngeingaih louh mok ding pen diklou mahmah ding bang hi. Hun paisa suutkik zek le I hihkhelh khakna uh tampi leng om ta bang hi’n theihtheih in om hi. Huaiziakin pilvang sem nading leng tampi om ding in gintakhuai hi. Government leh thuneitu ten bang gen uh a? Daktor ten hihding leh zuihding bang gen uh? chih te iki theihlouh khembawl hun hi nonlou hi.

Awle ahi a kum 2020 i hong galkai a, kumtawp i hon naih hial takun zaw, kumbula tukum sunga sep leh bawlding hiam, ahih kei leh i tup leh ngiim tangtun dia i mitkha teng tu kum tawp ah bangmah lou suak tampi om din gintakhuai sa ing. A sakminthang simlei kilchih a zelsuak “Covid-19” chih kammal michih theih leh miteng kam apan paunak a hong hita mok hi. Hiai natna a lungkham leh mangbang tampi om in, a sukkhak louhte nasan a huzaap ziaka ana mangbang gu simsim tampi ki om dingin gintakhuai hi. A hia ana kigin luat theihlouh leh kigin tuan dingdan leng omlou in, ei hun leh eilak mahmah leng a hong nawk khak nung hun bangtan hiam pai ana hi ta maimah hi. Eisung iki etvel chiangin kuamah thumang taka government in zuih dinga ageel leh guante zui ki omlou hileh akilawm hi. Thupiak ngeingaih khukkhak i omlouh ziakun a thuak taak mah leng i bang uh hilou hia mo?..Mihing hatna in ana kiveng ek lehang le kiven zoh ding zat zo ahih chi kei maithei. Aziak tuh eimite bel I pupa khanga annkhing-tuibuuk ki kawmtuah dialdial nam ihihman un SOP zuih chihte thil haksatak khat leng ahi hi. Huaiziakin ei mite diakdiak Pathian khuta asia-apha kingak louhngal hihtheih luat omlou leng ahi mai hi. Huchih lailai in mo unau na salam thil na ngaihtuah mahmah a na buai lailai in, khalam ah na dinmun kivel mah dih le, nana khamuang taktak na hia? Ahihkei leh ka khamuang taktak na de aw? chih mimal a ki dot zihzeh tuak kasa hi. Azawng ahau, a neu a lian khentuam-paihtuam a neilou hiai hiileng veikha in na lungkham kha hiam?.. Hiaibang dotna te a I ki ngaihtuah theih lai ahoih ahi, Pathian in hon taisan naikei chih phok thak inla a sapna za dingin na lungsim hon kiheisak mah dih. Toupa Pathian vehna kichi a gige a om ahi het kei, “Toupa’n ka Kha in mi khantawn in a sual nilouhlouh kei ding,..” (Gen. 6:3) a chi hi. Toupa kha in nang a hon veh gig in a hon sam gige ahi. Tuni in veh a om nahihlam na kithei hiam? natna leh lungkhman na a veh in na om hia?. Tuhun Pathian kiang lam zawt hun ahi a, hun kipahhuai ahi a; hotdamna ni ahi (II Kor. 6:2).

Unau aw nang leng Pathian in hiai tulaia natna (Covid-19) tungtawna hong veh ahi kha hiam? ki ngaihtuah in kivel thak di’n kon chial ahi. Nang ngaihtuahna pen Pathian in hon pompih di’n gingta mok kenla, himahleh Pathian in eite adia hoih in a sem zel ahi chih thei in, sihna tanpha eia dia hoih leng ana hi kha thei zomah lai hi. Sawltak Paul in Romte a laikhak ah “I hin leh, Toupa a di’n i hing a; i sih in leng Toupa a dia si i hi ngal a: huaiziak in, i hin in leng, i sih in leng Toupa a i hi uhi”(Romte:14:8) ana chi hi. Unaute lungkham in mangbang ken la, nanga dia hing hi zaw lou in, manpia-a hon lei, hon neipa ading in hing din kisa thak ni chih iki chialna ahi non hi.

Khovel ah natna chi tuamtuam ana omkhin ta a, natna lauhuai leh mulkimhuai pipi leng a hong om lai ding. I sihna ding ahih in zaw sihpih thamlou leh sihpih taaklou natna a omkei a, ei ki venzoh leh etkol zoh ziaka bangtan hiam dam theihna leng a omkha maithei. Himahleh mihingte sihna-le-damna ding tuh Pathian khuta om liauliau ahi zaw hi.
Khalam khamuanna hiam sih lungmuanna pen hotdam tate neih ahi a. Huai sih lungmuanna taktak nei nailou nahih in zaw na hotdamna kipahna hon ki velthak inla Pathian sam in. Tuni in unau aw hiai Covid-19 ziak sese lou in hiam, natna dang ziakin hiam aw, khosakna haksat ziak in hiam aw, mite banga lohching zoulou kisakna ziakin hiam in na lungdawng in mangbang vungvung hiam??.. Ahi, na lungkham in mangbang mahmah a tomchik daih khamtheih-guihtheih thil ah lungmuanna mo na zon nak sek. Hilou ahi, unau aw na hong lungmuana na hong khamuan taktak na dingin zaw Toupa Jesu kia ah ahi zaw. Jesu nei miten dahna ah leng kipahna a mu ua, lungkhamna ah leng lungnopna thuguk a nei thei uhi (II Kor. 6:10).

TOUPA JESU a nei miten lungnopna-khamuanna a kiching neithei uh hi…