Episode – XI :
Khovel a ka iit pen lah tangkha dia kinep huai nawn lou, kia tham louh in hiai bang a hihnat a ka om ziak in nungak toh kisai himhim sai le ka sawm nawn kei. Phone leng ka khoih gina nawn kei a Biakhoih ka mangngilh theih na a hihkhak leh chi in laisim lam leh ka lunglut na mah lasak lam a kihei ka sawm hi. Ka pate’ kiang ah Guitar kizil nuam ka hih dan ka gen a huai ziak in Guitar lui man tawmchik khat ka lei uhi. Huchi in Guitar siam khat a inn uah ka va inn naih a, ama in leng laa ka sakpih theih na di khop bel ka tumthei sam a, himahleh theihna hoih tak nei lou ka hih man a hoih tak a ki zilsiam ut a va sin ka hi.
Kalkhat in thumvei ka kuan zel a, huai tuh thohtanni, thohlehni leh sintawp ni ahi. Nitak annek khit in ka kuan zel a, dakkal nih zel khong kizilna hun in ka zang hi. Khenchiang in laisiam na bang hon buaisak simsim sak in om mah leh lunglut na ahihman in hun hawm siam a zilsuak teitei ka sawm mai hi.
Biakhoih in hon chat zil a, himahleh gina tak in ka houpih nuam nawn kei. Iit louh ngaih louh ziak hikei mah leh dinmun kikhiat luat toh kei a dia kisehlou hi’nteh chih ngaihtuah na nei a ngaihsak nawn lou ka hi.
Nitak khat Guitar zilzou inn ka tun in ka nu’n ” Den a mikhat in hong kan eive” hon na chi a ;
” Kua a nu? A min theilou maw? “
” Hmm… Theilou kei ve “
” Bang chi bang melpu a? Mitbuh a bun hia leh? “
” Hi… Mitbuh bun mah ei. Mi ngou, lian bihbiah sim, sam khah ngeingai khat ahi”
” Aww… Nu, Biakhoih ahi di leh. Bang di hon chi a nu? “
” Theilou… Kan kha hetlou ing a”
” Awle poikei ” ka chi hi.
Ka room sung ah ka lut a, Biakhoih in bang poimoh nei ahi hiam chih kan diing in Whatsapp ka online hi. Biakhoih toh ka kihou theih nung uh ka lawmnu toh kihou kha nawn zezen lou a ka om nung un tunitak in amah apat message ana om a, ken leng ka reply ngal hi. Biakhoih ka houpih ngeilouh thu ah a ziak khong hon dong a, ken leng bang mah iim nei sese lou in ka hilh hi. Biakhoih in kei hon phawk lua leh ka ngaihsak nawn hetlouh ziak a lai le sim peihlou, ann bang le gina tak a nengap lou ahihdan thute hon gen a, hiai thu ka zak in ka lungtang hon sukha mahmah a ka kisuanlah tha hong suak peetmah hi. Huai in Biakhoih message ka en ngal a, himahleh ama hon chat na pen dawng lou in tunitak a hong phak na thu uh ka kan hi. Ka message a muh phet in hon reply pah ngal a ;
” Koi a ana hoh neita u Lal? “
” Guitar zil a kuan zel kei ve”
” Ka dawr uh ka phak kawm a hon mu ut lua ing a hong baang zual ka hi. ” hon chi hi.
” Bang na chi sim a ahia Biak’?”
” Khawl aw k’on call thoh di” hon chi a, ken le ka aw ngal a, ka data ka off pah a a hon call di ngak in ka om hi. Tomchik sung in hon call a ;
” Hello… ” ka dawng hi.
” U Lal tulai nang bang chi e? “
” Bang chilou e Biak ‘? “
” Bang ziak a n’ong hoh ngei nawn louh a? Hon ngai thei lua keive ” ka iit penpen ahi a, chitak deuh mai leh a lungsim taktak a a hon gen ahi chih a aw suak apan in ka theithei a, ka khasiat tha lamlam bang hong suak hi.
” Na hoih zel na uh maw Biak’? “
” U Lal, huai thu zaw gen dah ni. Haksa sa lua kei ve “
” Ngaihsiam aw leh. “
” Awle… Kiginni chiang in hong hoh in aw. Kou dak 12:00pm khong a tawp zel ung a. Skul ah hong pi in aw” hon chi a ;
” Biak’ ahi lou lam in ana ngai ken la k’ong hoh nawn dah mai di aw. Nou hausa lua uh chin ua kisuanlah huai in chin “
” Kisuanlah huai lou lua ahi. Kisuanlah na di bang mah om lou pi “
” Hithei sak dah mai ni. N’on muhnop leh a pawlam ah kimu zel zaw ni “
” Kei pawt thei ngeilou kei ve. Ka pawt theih na di chance 1% lel khong hi di ahi” a inn ua ka hoh di nget in hon ngen ngutngut mai a, himahleh a inn ua hoh nuam nawn lou ka hihman in thil om dan ka hilh khong mai hi. A mah le a lungsim a buai peetmah a, nu-le-pa lungsim lou lam lua ahih khak di a lau mahmah zel a, ka hehpih peetmah. A nu-le-pa gen bel sel kunkun ut lou ahih lam leng ka theihsa ahi. Ahitak a tua a ngaihzawng pa deih lou lua tuh ahi a, a ngaihdan hikei mah leh a nu-le-pa gen ahih ziak in a sel ngam kei zel.
A deihlouh na ziak le bang dang ziak ahi kei a, a maban di a et na ziak ahi zaw. A nu-le-pa’n leng Biakhoih maban di a etna uh ahi a, huai bel khosakna nuam zaw leh tawldam huai zaw ahi. Himahleh Biakhoih in a hon gen a, aman a et chiang in sum-le-pai ah kiningching mah leh innkuan kithutuah na leh etkolna toh kisai a bang mah suaklou di ahih dan a thei khin hi. A ngaihzawng pa a tapa duat uh ahi a, a deihdeih a leisak ua, a ut bangbang in a om sak ua duat khial petmah uh tuh ahi ta. Biakhoih in, a pawt khop chiang ua zu dawn zel a, amah leng dawn dia zawn zel ahihdan hon hilh a himahleh aman bel ana nial’ kinken ziak a tutan zu dawn lou a om ahi.
Tangval lai na tawm a zu hai a, khamkham thei ahihman in kiteng hile uh a innsung ua a gentheih didan a mu chian lua a huai ziak a mipil a dia zaw iit taak lou mah ahi. Nungak tampite’n khamtheih hihte ngaih huai a chi ua, a kam uh leng a siam diak mahmah a huai ziak in a iitna thu uh a gen chiang un iit ziak hi khollou ahih hang a hehpih ziak in ana kingaihpih ua, ana kiteng sek uhi. Himahleh a kiten ma ua kamsiam leh nunnem huathuat zezen hi na pi in a kiten khit chiang ua a maipha uh zongzong ngaplou uh tuh ahi dia, zukham in a hong kitom a, a hong kina ua, huchi in a hong nawkik napnap zel uhi. Tua ahihman in, Biakhoih in leng tuate muchian lua a, sum-le-pai leh hauhsakna sang a iitna dik mah poimoh zaw ahihdan a thei mahmah hi.
Tunitak ka kihouna uah aman leng apa’ kiang a ana thuum a, sum-le-pai leh hauhsaknate’ sang a iitna dik en zaw diing a ngen di ahihdan hon hilh hi. Banah, bang peuh tung mah leh ken k’on taisan kei leh taisan lou diing in hon ngen a, a mah toh kihou a kithuzak di leng huphulh lou diing in hon gen hi.
Biakhoih iitna a dik dan ka thei a, kamsiam tak leh a lungsim chiimtak toh hiai bang thute a hon gen chiang in ka lungsim tengteng amah lam ah a kiheikik nawn vek zel hi. Ama a dahlua leh lungzuang tak a om himah leng tun bel kipahna in ka dimkik zel hi. Hun lemtang om chiang a hon hilh zel a, huchia kimu zel didan in ka kihou lem uhi.
Kiginni hong tungta a, zanlam a a hon nget bang in leh tuzingkal a a hon gen nawn ziak in dak 12:00pm vel in a skul lam ua pi diing in ka va kuan hi. Huai ni bel a vek ua kai ahihlouh man un a huchi tam lawkei uhi. A hong tawp nainai ta ua, a lawmte mithum toh hong kizuipawt ua, kei a hon muh leh a lawmte paisan in kei lam a hong zuan pah hi. Ka va ngak ziak in a kipak peetmah a, awl in lungkim tak in ka kizuitou uhi. Apa’n tuni program nei ahihdan hon gen a huai ziak a a inn ua hoh di bang in leng hon zawn hi. Himahleh a inn ua hoh di hial in bel hi kasa nawn hetkei huai ziak in ka sel mai hi. Kisathei-kiliansak chih bang in hon chi a himahleh theisiam diing in ka ngen hi. A gate bul tan uh ka va kha a, huai apat in ka kiksan hi.
Hun-le-nite hong paitou zel a, a inn ua lah va hoh nuam nawn lou ka hihman in kou skul ka kawlni uh Second Saturday chiang in amah pi gige diing in a hon ngen hi. Huai ziak in ka va pi zel hi.
Nikhat College kai ka tawp in lawmte toh puri subji ne diing in Lailam lei lam ka tawn uhi. Hotel ka tun un Biakhoihte’ skulte leng mi tampi ana om uhi. Biakhoih a om kha zezen de aw chi in ka etbawl zel a himahleh a mah di bang mi ka mu kei hi. Lawmte’n skul naupang dangte hoih a sak simsimte uh bang thoh bawl simsim ua, kei bel mithoh chi hi hetlou banah mi zumhatpi ka hihman in ka na gukzum sim hi. Kei ka hihleh bel midang leng ka enthei tatak kei a, Biakhoih kiakia ka lungsim ah om den hi. Ka puri subji nek uh ka zouta ua Hotel kong a ka pawtkhiat leh Biakhoihte’ skulte khat bike nung a hong tuangsuk ka mu a, a skulte ahih naknak a leh bel lametna liantak toh en kha pahpah mah tuh ka hi. Huchi in ka kiang hong tungta ua, ka lamet mah bang in Biakhoih ana hi mawk a, a ngaihzawng pa toh Bazar lam a kipat saklam manoh in hong taitou vuvut uhi. A man bel hon mu lou hi in ka thei, himahleh hichi bang a ka muhkhop chiang in ka lungtang hon hetkha thei sek mahmah a, a guktak in naa kasa vungvung mai hi. Huchi in ka mood teng hong flop gai zel mai hi. Lampi ah thabei kawm sasa inn lam zuan in ka pai tou ua, nisa lua himahleh ni salua ahihlam le phawk lou ka bang zezen. Biakhoih in a u Suanlian ngai lua hi di dan bang in ka ngaihtuah a himahleh hoih tak a ka ngaihtuah chiang in lah ngai mahmah lou himahleh athu va sel di pen apa’ thu sel bang a a kingaih sut ziak a a chih bangbang zuizel tuh ahi. Huai ziak a huchihlouh a ka theihsiam zawk di ahih dan ka thei khe zel hi.
Inn ka tun in ka houpih pah a, a online louh ziak in hon reply zok kei hi. A online zoh phetphet in hon reply pah a, tuni a a pawtna thu uh ka kan pah hi. Aman leng hon gen pah a ; a ngaihzawng pa’n bang mah le gen masa khollou a ama lungsim dandan a thil hih phutphut ahih dan hon gen hi. A ut hunhun a a inn ua va hoh phutphut a, pawt di khong a zawn phutphut ahih dan khong hon gen hi. Tua banah, kiginni chiang a ka vapi zel pen hon na gukmuh ahi dia, huai ziak a a man tuni a va ngak ahih dan leng hon gen hi. Im neilou a thil ahi bangbang a hon hilh zel ahihman in ka muan na a hong kibehlap semsem hi.
*Episode – XII :
Hun-le-nite hong paitou zel a, kha nawn hong hi a second Saturday ni in a skul ua va ngak diing in ka va kuan hi. A skul Kong pam deuh uah kava tu keuhkauh a, ka chim thawina in ka phone khong kana mek maimai hi. A hong tawptak un ka na ngaksekna mun thei den lai ahihman in kei kiang lam hon zuan pah hi.
Inn lam zuan in awl in ka kizui khia ua, khua lum mahmah ahihman in ice-cream khong ka leitou uhi. Kipak tak leh lungmuang tak a ka paitouh lai un a u Suanlian toh ka kituak kha ua, ka ma uah hong khawl chat hi. Biakhoih a om dan apat in nuam sa chiahlou ahihdan tuh ka thei a himahleh paulou hi. Suanlian a bike a pat hong kumkhia a, ka kiang uah hong pai hi. Biakhoih khut in hong kai a himahleh Biakhoih ana utlou hi. A huchih chiang in ;
” Hiai bang e?! ” a u Suanlian in chi a ;
” Bang eita? ” Biakhoih in dawng a ;
” A mah kua e. Bang chidan a skul a hong pi thei? “
” A hong pi leh bang a siatna om a? “
” Nang hichia hon kop himai maw? “
” Hon kop ka hi kei. A kingai ka hi kei uh “
” Na kizui gige uh hilou maw? “
” Bang ziak a ka kizuih pih a chih na thei hia? A mah a muan huai a ahi. Banah, mi dohzou leh nunnem ahi a kei a dia kipumpiak mi leng ahi. “
” Na muan leh a mah toh kingai ve leh. Aksa Mahajon na hong hipah di chuh ”
” Nang na ut dandan in na hun na zang a, ngaih le n’on ngaihsak louh hilou maw. Na ut dandan a na hon om pih hilou maw? Hichi bang mi toh zaw ka damsung in ka kiteng ngeikei di. I maban di ka mu lua, huai ziak tak ale hon ngai thei lou ka hi ”
” Na utut gen ken aw. Na pa’ thu manglou di maw nang? “
” Ka pa thu manglou ka hihtak lele ka hi mai di”
” Ok… A na en aw, na thei mai di ” Biakhoih in le dawng nawn sese lou a, huchi in a u Suanlian a bike ah va tuang in saklam manoh in tai kiktou vengveng hi. Huai nung in Biakhoih hong pau nuam nawn hetkei a, a mood bei mahmah ahihdan leng ka thei hi. Ka zeilouh toh gen di pi lua le ka thei kei a, a theilou om kei mah le ung a vangkim in khua lum kasak thu khong ka genkhe zel lel hi.
Tuni in leng a gate bul tan uh kha di’n ka kisa a, a gate uh a kigalmuh apat in a gate kong ua Suanlian bike khawl ka galmuh ngal uhi. Biakhoih in a u Suanlian ning huai a sakthute hon gen a, tuni in leng a u Suanlian a om ziak in a inn ua va baang sese di’n hon zawn a himahleh hithei ka sa mahmah kei a ka seel teitei mai hi. Huchi in a gate bul tan uh kha in ka kikhen ta uhi.
Kei kia a inn lam zuan a ka pai kawm in ka kingaihtuah a, Biakhoih ka hehpih tha a hong suak peetmah. Kei om kei leng hiai bang haksatnate tuaklou di zaw hi ven maw! Hoih tak a ka ngaihtuah chiah hihkhial ka kisa lua a, a neisa na nana tuh deih in deih tawk lele va ngaih teitei hetlouh didan ahi. Ei ziak a thilpiang hoih lou om teitei a hihlam ka thei chian semsem hi. Tun lah Biakhoih va kineel sak vet man ta zel ka hihman in va tawpsan belbul lelah a lungtang nasak zel di. Tawp san lou in va buai pihpih zel le lah a khatpa nasak zel di. Ka ma a bing peetmah a kei-le-kei thaang kikam khat ka suak hi.
A tung a Biakhoih in ka message hon na thuk (reply) nuam louh lai khong a ana tawpsan kha hi leng zaw hiai bang vengvung thuteng za lou a tuaklou di zaw hi’ng a chih vungvung in om hi.
Hun-le-nite hong kivei liam tou zel a, kal bang zah hiam sung Biakhoih in a hon thuzak nawn kei vengveng hi. A phawk lou tuh ka hi kei a, Whatsapp a ka chat chiang in a ki deliver ngei kei a, Netpack neilou houh a de aw ahihkei leh hon block a de aw ka chi a, ahih hang in a dp a kimu thei zel a ka buai peetmah hi. Ka lawmnu ka chat a ka kan chiang in leng bang mah a theihpih tuan kei zel. A kal a sim bang hon thuzak lou a a hong om kiikei tak in ka lung himoh tha hong suak hi. A inn ua va hoh diing in lah ka ngaingam kei zel hi. Huai ziak in plan khat ka bawl a, bang chidan a a mel muthei di. Damdam na ahi hiam chihte thei ut in a skul kai tawp va taang diing in ka kisa hi.
Kiginni khat College kailou zen in a gate uh en gu diing in ka kisa hi. A skul kai tawp di un a gate uh a kigalmuh theih na di mun ah ka na om ni louh a, sawtpi tak ka ngak nung in a u Suanlian toh Bike in hong kipawtou chanchan ua, a gate kong uah khawl in pau lou phun lou in Biakhoih in a gate sunglam uah lutsan a, a nung ah a u Suanlian in delh lut hi. Huchi in ngaih dan khat ka hon nei a, lungsim kikhin dimdem in a inn lam uh ka zuan hi.
Awl in ka inn lam uah ka pai a, ka inn uh a kigakmuh ta a, huai in ka inn ua pan Biakhoihte’ skulte khat paikhia ka gaalmuh a, huai lak a bang hong hih a zenzen de aw ka chi lungsim hi. Ka paiphei mengmeng a, inn sung ka lut leh ka nu’n ;
” Bawi, den a numei khat in hong kan eive ” hon na chi nawn hi.
” Kua a nu? Huai skulte hia? ” a skul min uh gen in ka dong hi.
” A mi zaw ka thei kei na a…. Hmm huai skulte ah” ka skul gente ahi chi ahihman in den a ka galmuh nu tuh hi di’n ka gingta tinten hi.
” Bang di hon chi a? “
” Hon kan a, om lou eive ka chih leh na hoh na hon kan a, nang lah na hoh na di gen lou na hihchiang a gen theilou ing a, huai a poi na e chi a hon paikhiak san ahi” hon chi a ;
” Achihleh den a ka muh nu hi di hivaw. Bang poimoh ade aw ka va delh di aw ” ka chi a, kintak in den a nu pai na lam ka va delh a, Lamka ahi na mah a lampi ka tam lua ahihman in ka va muzou nawn kei hi. Bang thu poimoh om a de aw ka chi lungsim a, hiai in ka lungsim hon kam gu geuguau nilouh hi. Inn lam ka kik kawm in ka ngaihtuah a, tulai mawngmawng thil ka hih himhim fuh chih om theilou ahihman in ka thangpaih tha lamlam bang a suak vungvung hi. Biakhoih ziak a ken le hiai bang a ning kitel leh nuam lou tak a om ing a, a man lah thuzak le hon sawm nawn lou. Whatsapp hi in Sms a message ka khakte lah hon thuk ngeilou, hon deih nawn kei a ahi di chi in a selam lungsim bang ka kipe kha thepthup hi. Hon ngaihsak nawn lou ka chih mah den a ka va ngak lai ale a u Suanlian toh hong kipawtou vavat uh hiven, a kal uh a hoihta a hi’nte chih dan lungsim ka nei, kei ah bel Biakhoih toh kisai in ka kikhin dimdem ta hi.
Inn ka tung ta a, ka nu’n ka mi delh pen ka va phak leh phaklouh thu hon na kan a, muban nawn lou ka hihdan ka gen hi. Ka nu’n poi a sakthu hon gen a, ken leng thil poimoh khong gintat louhpi a om thei phutphut sek ahihman in tuban hoh na di hon kan kholkei mah le uh sungkuante’ kia gen ngeingei di ahihdan ka thei khia hi. Huchi in ka room ah ka lut a, lawmte kiang ah tuni class a note a hon piakte uh leh assignment a hon piakte uh Whatsapp tungtawn in kakan a, note bookte ah ka gelhkhia a, hih di dang a om tuan louh man in gelh di omte ka gelh ngal hi. Huchi in nitaklam annek hong hun pah hi. Ann kane ua, annek zoh in ka laigelh zohlouhte ka gelh a, ka gelh zoh in lai sawtlou ka sim huchi in ka lumta hi.
Biakhoih in lah hon thuzak ngeilou ahihman in Whatsapp ah hih di lua leng ka thei kei. Midang lah ka houpih peih tuan kei a, ka lungsim a beilou ahihman in a mahmah ka chi tinten lai veve hi. Himahleh hun sawt zil a mangngilh mai diing in bel ka kigingta hi.
Nikhat ka College kai tawp in ka Whatsapp ka online a news groupte khat ah accident om ahihdan ka va mukha a, lim leng om ahihman in a thu ka sim ma in download diing in ka load pah ngal hi. Huchi in a thu kigelh ka sim a ‘Tunitaklam dak 3:00 pm vel in Bike a minih kipua in Tata Truck khat toh kiphukha ua, a nih un hahliam mahmah ua phatuam ngaite’ n Lamka Damdawi Inn ah pawlut uhi. Accident-te ahihleh khat pen student hi a, a I-Card apan a kimuh dan in Biakhoih ( chih kigelh in, a details : pa min leh om na veng leng kigelh) leh Suanlian ( amah leng a License apan thuchiang kimu thei) hi uhi. A sungkuante’n a kin theilam a damdawi inn lam delhpah hoih diing hi’ chih kigelh ka mu a, kintak in a lim ka download pen ka en a, a mel uh a kimu thei kei zawmah hi. Ka lung a hon pawng luat ziak in om didan le ka thei zezen kei. Ka room apat ka pawtkhia a, ka nu kiang ah thu om dan ka hilh pah hi. Ka kahtha lamlam bang a hong suak zezen a, ka nu’n leng poi a hon sakpih peetmah a, va hoh diing in hon sawl hi. Kei leng ka kisa a, damdawi inn lam a hoh di’n ka kuan suk hi. Ka kuan dek in ka nu’n sum teng 50/- a hon pia a, huai in auto ka tuangsuk hi.
Damdawi inn ka tungsuk mawk a, koi a om uh ahia chih leng ka theikei a ka va buai peetmah hi. Ka daak velvel leh munkhat ah mi lom om sim ka mu a, amau om na lam ka va naih tei hi. Tualak ah Biakhoih unu ka va mu a, a mel ka muh lel in le a dah mahmah chih a kithei mai hi. A man le hon na mupah a, ka puanak ah hon na letsak tentan a ;
” Lal’ kei bang chi di la? “
” Biakhoih bang chi a? Koi a om a? ” ka chi a ;
” ICU a om ahi ” a hon chi a, ka lungphu hong haat guih hileh a kilawm a ka diip bang hong hawm heihuai a, ka lung bang hong am dek chuaichuai zezen hi.
” Paikhe zual ni…. ” ka chi a, mun thoveng zawk deuh na mun ah ka paikhia ua, chihleh ka lawmnu leh a innkuante leng a car un a hong tung geih ua, ka lawmnu ka na sam pah ngal hi. Ka kiang uh a hong tun in a thu om dan leh a dinmun hon kan heha a huchi’n Biakhoih unu’n hichi’n gen hi ;
” Biakhoih maw, a munmun a khawphawk lou a om ngal chi ua, Internal Bleeding chi un chin tua ICU a koih uh ahi ”
” Poi na e… A chih leh Suanlian la? ” ka chih leh ;
” A mah huai ah a buaipih ve ua. A mah le khophawk lou chi uh a bang “
” Bang chidan a gari khong a phutpih eita. Ka nak heh e lawmlawm ” ka lawmnu’n chi a ;
” Nang sang in heh zaw hang e” ka chi a, Biakhoih unu’n le hon amen pih peetmah hi.
Beidong tak leh lungkhamtak in Damdawi Inn vadandah ah ka thum un ka tu ua, ICU sung a lah va lut theih himawk lou ahihman in hihtheih ka nei kei uhi. Ka hihtheih sunsun bel lungsim a thuumna neih ahi mai hi. Huchi’a lungkham tak a ka tut ngeungau lai un a skul ua a sinsaktute hi dia ka gintat numei leh pasal bang zah hiam leng kinoh chitak in hong pai ua, huchi in a principal pa uh hi dia ka gintat khat toh Biakhoih pa kihou uhi. Lungkham tawk in awlmoh tawk lele hihtheih dang om tuan lou ahihman in ka om dandan un ka om ngiungeu mai uhi.
*Episode – XIII :
A sinsaktute toh Biakhoih pa a kihou khit un ka kiang uah hong pai a, Biakhoih unu kiah inn lam vapha a, van poimoh tuamtuam damdawi inn a giah na di va la di’n sawl hi. Himahleh a car ua hong pai ahihman un gari hek siam lou chi in kimuang zoulou tuh ahi dia lem sa chiah lou in apa sawlna pen nial hi. Apa’n lah a paikhiat di lem a sa kei zel a, himahleh a loutheilou a giah ngai himhim di ahihman in inn lam pai di’n kisa hi. Himahleh a paikhiat madeuh un thu khat hong om a, Phai lam a refer uh ahi dan hon gen uhi. A bang a bang hita lele inn lam phaklouh theihlouh khat a a om ziak in a inn lam ua pai di’n kisa ua, apa, a unu leh ka lawmnu ahi ua himahleh ken nuam ka saklouh khak di hon lau uh zaw ahi dia Biakhoih unu leh ka lawmnu’n hon sam ua, kisuanlah sim kawmkawm in gari ah ka va tuang mai hi.
A inn uh ka tungtou ta ua, Biakhoih pa, unu leh ka lawmnu’n a room lam khong ua lut in zanpuan di leh van poimoh tuamtuam hon lakhe zangzang ua, ken puak theih ziau diing in gari sung ah ka va guang hi. Huchi in inn khong hoih tak in ka kalh ua, damdawi inn lam manoh in ka taisuk pah nawn vengveng uhi.
Damdawi inn ka tunsuk nung uh sawtlou in Phai lam a paikhe di’n kisa nawn ua, kua teng hoh di chih mai in leng buai in a buai uhi. Naupang neu teng toh vek a hoh nainai di maw? Ahihkeileh anu hiam a u nu hiam heu a inn a ana om di? Biakhoih unu’n lah kei le mi dangpi himahleng Biakhoih ka iit lam hon thei lua ahihman in ka om hoih hon sa a, himahleh a sungkuan dangte’n bel kei lamlam a hon na ngaihsak kha hetkei uhi. Kei bel buai in ka va kibuaisak hi. A tawp in thutan na hon la ua, a u heu a naupangte toh ka lawmnu toh a inn ua ana om diing in hon thupuk uhi. Car lah Phai lam a keng dek ahihman un ka auto paiman di uh sum bang zah hiam hon pia ua, inn lam manoh in ka taitou hiauhiau mai uhi.
Biakhoih iit tawk in ngai tawk in, a kiang a om gige ut tawk lele a mau toh kitanauna bang mah neilou ka hihman in ut dan leh ngaihdan leng ka gen thei kei a, a guktak in khasiat tha lamlam bang a suak thei velvul hi.
A inn uh ka tungtou ta ua, bang mah le sem peih pah lou in a inn uah ka tu nelnul uhi. Hiai bang thil kituak ngeilou ahih zawk mah toh lungsim tuh a hamhaih petmah mai. A dendeuh chiang in Biakhoih u leh ka lawmnu’n ann khong hon huan pan ta ua, huchi’n a unu’n ka min hon sam a ” Tunitak lam hiai mun ah anne ngal in aw” hon chi a ;
” Theilou maw… Nek le a ngai tuan dia hia”
” Na nute’ kiah gen le maw “
” K’on gen him mah aw ” chi in ka nu ka call a, thil om dan khong gen in hiai mun a anne dia ka kinget leh hon phal vanglak hi.
Duh kei tawk lele anne lou hial a va om di lah mah ni kigawt huai maimai sa ka himan un ann ka ne himhim uhi. Ann kam a limkei petmah a, genkhe khol kei mah le ung leng lungsim ah Biakhoih kiakia a om den hi. A naupa bel naupang ahih hang in naupang lua hi nawn lou a, buaipih ngai hial nawn lou hi.
Ann ka nekzoh un hih di a om kei petmah a, tut in ka tu ngeungou ua, huchi’n Biakhoih unu’n numei kia leh naupang khat toh kia di ahihman un thawmhau huai a sak thu hon gen kawm in giak suak ngal diing in hon gen nawn hi. Himahleh giah hial di pen lemtang ka sa kei a, ka nial mai hi. Ut thu in bel ka ut lua a, Biakhoih ziak in a vek un ka ngaina vek hi. A diak in a unu bang in leng ngaihnat na tak hon nei hi in ka thei. A pa chihlouhte zaw ka ngai na a, a kiang ua om leng nuam ka sa. Himahleh a pa’n bel hon hawl a hawl thoh a bang a, nuam ka sa chiah kei. Ka pa ka call a annek zoh a le hong om zek lai di ka hihdan ka hilh hi.
Nitak hong hih in, Phai lamte le hong lung himoh huai lua ahihman un Biakhoih unu’n a nu call hi. A nu gen kizalou a ama gen kia za ka hihman un bang gen uh ahia chih ka theikei ua, huai ziak in a kihou zoh un ka kan uhi. Aman leng hoih tak in hon gen a, a om dan bel ; Biakhoih in khua phawk nailou ahihdan hon gen a, banah a si sungkai (internal Bleeding) ahihman in aat ngai di ahihdan leng hon gen hi. Hiai thu ka zak in ka dah law peetmah a, si sungkai ahihleh zaw ka khahsuah mahmah di maw ka chi a ka lametna a bei hilhial hi. Biakhoih unu ka sam a;
” Si sungkai ahi a, ahihleh lauhthong huai law lou di hia” ka chi a ;
” Nunute le lungkham lua uh ahi. Khua bang hon phawk photphot leh chu maw thuak le a dan hong om deuh di hia ”
” Biakhoih i khahsuah di zaw ka ngaingam mahmah kei. Iit lua kei ve “
” Nang toh kingai hi le uh chin zaw hiai teng le a tung a tung lou di hia maw”
” Sian lemgel a zaw diam maw. Ken le ka thei siamkei. Hiai bang hial a tung a tung ngei di ka sak kei leh. Banah, ICU tan hial zaw last stage hi a, ka lungkham lua eive. Ki-aat ma ale ICU a om a, ki aat lailai leh bang suak di la” ka kahtha lamlam bang hong suak a, ka ngaihtuah sau chiah Biakhoih ka hehpih peetmah a, a lehlam ah lah apa a thil hihkhelh a kiphawk na ahi zaw diam ka chi lungsim zel hi.
Nitak hong sawt sim ta a, a naupa bel ihmu ta hi. A nute’n hon call nawn ua, zingchiang a a papi toh a Scorpio ua hong zin di’n hon gen uhi. Huai in Biakhoih unu’n kei leng hon zawn kawm ngal a, a bang a bang hileh kipahna lam hikei mah leh zingchiang a Biakhoih mu di ka chihchiang in kipah na khat om veve hi. Huchi in a nung sawtlou in nitak bang le hong sawt law simta ahihman in inn lam ah ka paisan phot hi.
Inn ka tun in ka sungkuante ana lum ta ua, inn ka pai a hon theih un ka nu leh pa hong thou khe zezen ua, Biakhoih toh kisai thu om dan hon kan ua, ken le ka hihtheih bangbang in ka hilh vek hi. A mau leng poi a sak thu uh leng hon gen uhi. Banah, zingchiang a Phai a hoh sawm ahih dan uh leh ken leng va zui nuam ka hihdan ka gen leh hiai bang a hun lemtang a om leh tuh hoh lawtel diing in hon gen ua, a hon phal luat ziak un ka Kipahthu leng ka gen ngal hi. Huchi’n ka pa’n thumna a phawk chiat diing in leng hon gen ngal hi.
Nitak ka lumta a, ka khasiat na mahmah khat ahihleh nidang hileh tuhun khong a ahihkeileh ka lup hun chiang a Biakhoih toh ki chat gige ung a, tua lah Biakhoih ka chat di chih theih lah hilou. Chat himawk leng le a man hon thukkik ngei lou di ahihman in ka khasiat tha hong suak hi. A dendeuh chiang in Biakhoih unu’n hon call a, dendeuh a a u Suanlian in Phai a Shija Damdawi Inn mah a hon mualliam san ahihdan hon gen a, poi lua tuh himahleh ka melmapa khat ahih mawk man in huchi tel in kipawna theilou hi. Suanlian gari hek tu ahi a, sik lukhu (helmet) khulou ahih zawk mah toh Biakhoih sang in leng a tuung apat a dinmun sezaw himhim tuh ahi. Huchi in lungsim nuam lou tak leh thawmhau geuguau kawm in tunitak ka hong ihmu ta hi.
Zingkhua hong vak a, Phai lam hoh sawm ka hihman in skul kai lou di tuh ka hi nawn ta photphot hi. Ann ka nekzoh un Biakhoihte inn a hoh di’n ka kisa a, ka kuankhiak ma in ka nu’n a vehna di chi in dangka tamlou hon pawsak hi. Huchi in ka inn ua pat in Biakhoihte inn zuan in ka paitou hi.
A inn uh ka tun in a papite leng ana tungkhin ta ua, a papi’n ka gari pai na di uh ana gingsakta hi. Biakhoih ute leng ana man simta ua, hong kisa mengmeng in inn khong hoih tak in hon kalh ua huchi’n Phai lam manoh in ka kipankhe ta uhi.
Kei hi, gari tuang theilou pawl ka hi a, a diak in gari tungneichi a ka tuang chiang in ka kham baih se a, tua mah bang in tuni in leng lampi ah ka kham law sim hi. Himahleh Phai bel dam in ka va tung nimnem sam hi. Damdawi Inn huang sung ka lut ta ua, Gari apat ka kumkhiak un Biakhoih in hon na en didan peuh in ka kingaihtuah a ka zumtha lamlam bang hong suak hi. Biakhoihte om na lam hon naihpih pah ua, a mun ka tun un a mun a ana omte’n hon na chibai uhi. Ken leng tamkei mah leh ka nute’ hon dangka puaksak apa kiang ah ka pia a, kamsiam tak in “Hiai khong ngai hetlou zaw hia” hon chi a ; kamsiam tak a hon chih lel uh ka zak in’ , nengchik hon maingal sak zek pah hi. A papite’n leng Biakhoih dinmun khong kan ua, khua phawk zou nai tuan lou ahihdan hon gen uhi.
A mun i tun hial leh bel va hih di le om tuan lou a chimdeuh a va tut ngiungeu ahi zel mai hi. Ka va paikhia a, Biakhoih om na room lam ah ka va pai hi. A room kongkhak a glass kituah ah ka va dak a, Biakhoih bang mah phawk lou, dawi dide a lum ka mu a, ka hehpih peetmah a ka lungsim in’ a mah ka ngaihna thute a genkhe zungzung mai hi.
” Ka iit Biakhoih, na u Suanlian in a tangtawn mun di hon na zotsanta ahihlam na thei hia? Tun nang kei hon paisan hile chin kei bang ka na chi khosak di. Nang apat kihemkhe di ka chihchiang a leng nikhat na mel mulou ale om zoulou hi’ng a, nang toh kihoulou ale om zoulou hi’ng a maw ” ka lungsim in ka chi a, ka ngaihtuahna in hon nehnou sak zou zezen a, ka mittui ka biang ah hong luangkhesuk hi. Huchih lai in ” Hehpih huai e maw Lal’ ” ka lawmnu ka kiang ah hong pau kaukau a, ka na kiguih hial hi.
” Eivoi. Hehpih lawpeetmah ka hi ” ka chi a ;
” Bang chi. Kap na maw theithuai “
” Kap zaw kap hial lou keive. Hilele ka hehpih lua a ” ka chi hi.
Ka lawmnu toh ka kihou lai un, a unu hong pai a ” Biakhoihte class a a lawmte’n le hong veh uh eive ” hong chi hi. Huchi in kou leng apate om na lam ah ka va pai uhi. A lawm hong hohte kou leng ki-inntek sak deuh mai in ka va chibai uhi. Huchia ka va chibai sauhsauh lai un, a lak ua nungak khat in ” Nang u Lal maw? ” hon na chi a ;
” Hmm.. Himah ing ei. Bang a chia e? “
” Ana khol zual dih” chi in a bag sung hon mai a, a ning lamdeuh ah hon samkhe zezen a ;
” Asha! Lakhe kha ka hi di e. “
” Bang eita? ”
” Biakhoih in zanlam a laithon hon pawsak a, na inn ua piak di hon chi a nikhat k’ong piak dek leh nang a na om lou chin a. Heh huai e, hiai a kimukha di kisa leng zaw hon pawlawtel di hi’ng a ” hon chi a ;
” Bang thu ade aw..? “
” A thu zaw kei kia le hon gen thou ahi”
” Bang a hon hilh ve “
” Aw… I maw tulai bang chik hiam apat hon houpih ngei lou eive maw? “
” Whatsapp ah maw? “
” Hmm… Phone himhim ah”
” Hi… Bang ziak a? “
” I maw… Huai, nikhat skul kaitawp na pi ni a a u Suanlian in hon mukha hia maw le huai a apa kiang a ana hek in chin huai apat apa’n a phone laksak in chin pekik nawn lou ahi. A zoh huai kia le hilou nang skul a na va pi gige hon thei a, huai nung siah apa’n niteng a skul kaitawp teng a a u Suanlian va pisak gige ahi. Zukham sa khong a gari hekhek ahih chia, huai ziak a zan ale hichi uh hilou di hia! ” hon chi a, aman hon gen zom nawn a ;
” Biakhoih toh kei line khat a tukhawm ung a thilteng hon hilh zel ahi. A man nang hon ngai lua eive. Hilele a pa a zahtak luat ziak in a u Suanlian a khen ngam kei a hiven. ” hon chi a ; Zanlam kiginni a Suanlian toh ka kituah ni ua a gate kong ua a Bike khawl ka chih mah. Huai ni a Biakhoih in a u Suanlian a inn ua ana om engbawl na dia va lut sese dia hon zot lai in va lut kha mai leng zaw chih vungvung in om hial hi.
” Aah! Huchi dan hia. Ken hon houpih nuam nawn lou ade aw ana chi keivoi. A u Suanlian toh a kal uh a hoih a hi’nte chi ing a. Skul kai tawp a a kipi zel bang uh ka muh zokmah chiang a ” ka chi a ;
” Mawkmawk… A u Suanlian ngai mahmah kei ei. Huai nung pawt le pawt sak se lou. Kuan chia apa’n kha, pai chia a u Suanlian in chih khong hi” hon chi a, apa hon bawl dan zaw ka theih thakthak chiang in Khasiat huai tuntun a bang hi.
” Ok… Kipah huai e leh n’on hilh a ” ka chi a, lawmte lak ah ka va om nawn uhi. A mau bel sawt hon om pih man lou in hon kiksan pah uhi.
Nitak lam hong hih in inn lam pai di’n ka na kiguk sak simsim hi. Himahleh pai vai hon saipih ngeikei uhi. Ni tum di bang hong hita a, Biakhoih unu kiah ka om didan uh ka va kan a, aman apa kiang ah dong sawn hi. Huchi in Phai a giaksuak dek ka hihdan uh hon gen a, eh! Ka chi kha heihuai zezen hi. Khua hong mial ta a, Biakhoih in lah khua phawk lou in om kiikei hi. Ka sungkuante ka call a, thil om dan ka gen leh tukal le beidek, College kai na di ninih khong chauh om hiven Biakhoih ute a hong pai kei a a buai huai di a om kei leh om suak diing in hon gen zawmah ua, ka pate’ hon theisiam na thupi ka sa lawpetmah hi. Nitak bang hong sawt sim ta a, huchi’n Damdawi inn a giah dia lah a giahman tam ahihman in Game Village lam a a tanaute uh inn ah tuni a hoh teng, a nau neupen uh sim louh ka va pai ua, huai mun ah ka va giak uhi.
A zingkal khua hong vak ta a, anne khin in Damdawi inn lam mah ka va zuan kik nawn uhi. Tuni Doctor in a et zoh in thuthak kipah huai ka za ua, huai tuh ; Biakhoih aat ngailou a hoih thei di ahihdan hon gen ua, huai thu in ka lung uh hon nuamsak petmah hi. Himahleh nitak nih leh sun khat bang paita a khua phawk tuan lou a a om dide in lungsim hon nuamsak thei tatak kei hi.
Biakhoih accident nung nili bang hong hita a, Lamka a pai nai tuan lou in Phai ah ka om den uhi. Mi hai ka bang zezen, apate’n hon huai kei mah le uh Biakhoih unu leh ka lawmnu’n a hon huai ziak un ka omom thei hi. Nitak khat hichi a hong hi a ; Biakhoih lupna gei ah ka ding ua, Biakhoih a hong tang a hong naak leekleek hi. Naak haksa hon sasim tuh ahi dia, ka et lel in leng a gim huai didan ka thei. Ka hehpih peetmah. Ka mittui ka biang ah hong luang suk zungzung a, a loh didan thei lah ka om tuan kei ua ka en heuhou uhi. “Na gim law mahmah di maw Biak’. Nang thuak hilou in kei thuak hi zaw leh maw.” ka chi a ; naa sa in hong kipek a, a mit lah a hak tuan kei. A khe khong hon ton volvol a, a khut tum bang hon sim chenchen zezen hi. A lu a langlang ah a hei a a naak heekheek mai hi. A tawp in a hu naakpi in hon diiklut a, awl a a hu khahkhia in hong dai vengveng hi. A khut sim awl in hon khakhe suk a, tang lou in hong dawi dide hi. Huchi’n a nu leh unu’n a min sam in a pum ah kawi in kap huphup ua, kei leng a luzawn ah ka va pai a ;
” Biak’! … Biakhoih! Ka iit Biakhoih ” chi in ka sam a, hon dawng mahmah lou in dai dide hi.
” Biak ei. Hon dawng ve. Kisathei na chia maw! Nang lou in kei ka bang chi khosak dia eita!? Na mel mulou in ka hing zou dia eita!? ” chi in a ngawng ah ka kawi a kakap khe ngoihngoih hi. Ka kiim ka kiang a kua teng om ahi ua chih leng ka thei kei. Leitung a ka iit penpen Biakhoih in leitung a hon nutsiat san mai zaw na kasa lawpetmah. A mah toh ka hunlui zatkhop dante ka lungsim mitkha ah hong kilang zungzung mai hi. Huchi in a kong lam ah ka va taipawt a, apa verandah ah mittui nul in baang ah ana kingai hi. Apa’n hon na sam a, men phimphiam kawm in ;
” Lal, poilua! Ngaihsiam aw “
” Bang ngaihdam ahia n’on nget? ” ka chi a ;
” Nang toh k’on na deihsak louh khak ziak in.”
” Bang chi’n …!? ” ka chi a ;
” Sum-le-pai zaw bang mah di ahi kei. Sum in hinna leitheilou ahihdan ka thei chiang mahmah ta! Nang toh hon na khen lou hi leng zaw….. “
” Hile chin bang chi di ahia? “
” Hon na khen teitei lou hi leng hiai bang teng a tung a tung lou di hia. A hon iit dan le hon gengen zaw hia aw. Kap zeen a nang a dia a hon nget ngutngut lai in a ngetna ana pomsak kha hileng tuni a ka tanu khahsuah lou di hi’ng a.” chi in kap huphup hi. Ken leng gen di thei tuan lou in ka kap ekek mai hi. Huchi’n apa hong pau nawn a ;
” Lal..? “
” Immm…. “
” Nang di mah na hi. Sum-le-pai leh neih-le-lamsang in iitna dikmah a poimoh zaw. Tua lah Biakhoih in a tangtawn mun di hon zotsan ta ahih chia’h a u toh na kiteng mai di uam? Hichi tuk a k’on melmak lai a leng kou a dia chitak leh ginom nang bang khovel ah ka mu nawn kei di ” hon chi a ;
” Biakhoih hong hing thak a, a mah toh kiteng ka hihkei ua leh zaw ka iit louh pi toh zaw ka kiteng thei kei diing. Aman le ngaihzawng a nei a a man a iit mipa toh a kal uh suksiatsak nawn ken! Khovel ah iit na dik kaan a manpha leh thupi om lou ahi ” ka chi a, a hon dawn nawn ma in room sung ah ka luut san a, tanau lainate Biakhoih luang tung a kahkhum ngoihngoih uh ka muhchiang in kei leng ka mittui khaam vuallouh in hong luangkhe zungzung zel hi. Biakhoih mel hiai leitung a ka muhtawpna di himawk a chi a ka ngaihtuah chiang in ka khase lawtel a, naakpi a kahlouh hihtheih om lou ahihman in ka kapkhe huphup mai hi. Huchih lai in mikhat in ka min hon sam kaukau kaza a, hon sapkawm in ka pum hon sawi hi. Huchi’n ka khanglou guih a zingkal khua ana vak law mahmah ta hi. Kei lou ka luppih teng ana thou khin vekta ua ka kiim ah lamdang sa lua hileh kilawm in hon na en heuhou uhi. Biakhoih unu’n hon houpih a ;
” Bang chi e? Na mang a Biakhoih si hia? Kahtam khong n’on lou mawk a, na kap khe huahua a” hon chi a, ken leng thil om dan ka gen hi. Huchi’n a unu mah in ;
” Thou in la kisa aw. Biakhoih in khua phawk ta ahi. ” hon chi a ka kipak petmah.
” Bang chik in e? ” ka chi a ;
” Den lam deuh hi di. Khua a phawk tungtung a nang ahi a hon kan masak pen. Huai ziak a kapa’n tu mahmah a Damdawi inn lam pha dia hon sam ahi ” hon chi hi. Kin tak in ka thou a, kihahsiang zokzok in Damdawi inn lam zuan in ka taipah uhi.
Damdawi inn ka tun phet un a nu-le-pa’n hon na muak ua, zingkal a a dakchiam om a ICU sung luut theih ahihdan hon hilh ua, Biakhoih mel muh di ka kithalawp peetmah. Apa’n hon houpih a ;
” Lal’ minihnih chauh a lut theih ahi. A u toh va lut un aw”
” Huchi di maw ” ka kipah luat man in ka nui heuhau a, gen di pen le ka thei zezen kei.
” Hmm… Va lut un la. Biakhoih in a hon kan masak penpen nang na hi. Tuni apat Biakhoih a na hi ta, a lungsim a om pen a kiang a om na hi chih va kitheisak in aw. Biakhoih le hong hoih pah ta di ahi chih Doctor in gen ahi ” hon chi a, ka lungdam peetmah hi. Huchi’n ka lut ta ua, Biakhoih dawi dide in ana lum hi. Awl in a khut ka va letsak a ;
” Biak’ nang bang ana chi e? N’on thei hia?. Na u Lal kei ve ” ka chih leh awl in a lu hon tangsak a, a muuk hul siusiau kimat chitchet a om hon ka a, a mit hak lah sasa in hong hak hi.
” Biak’ tuni apat kei a hi ta na hi. Na kipak hia? Na kipah leh hong nui dih ” ka chi a, ka gen thei ahi dia haksa sa kawm pipi in hong nui dek heuhau hi. A nuihmai ka muh in’ hon lungnuam sak peetmah a, kun suk in a muuk daang kiuhkeuh leh hul siusiau ka muuk in ka tawpsak a ;
” Hong dampah ta di na hi aw. Kei na Uu in na kiang a hon om pih den di ka hi ” chi in, khovel a ka iit penpen Biakhoih toh ka lamet phak hetlouh tuni in ka lungtup ka mualsuah zou ta hi. Ka kal ua iitna gui a hong zaam, bang teng ka tung uah hong tung mah leh phelkik nawn lou diing in ka lungsim in tong ka chiam ta hi.
Thukup :
Hiai tangthu in hon sinsak nop ahihleh sum-le-pai leh neih-le-lam sang a iitna dik mah poimoh zaw ahihdan leh tate kepna ah a deihtelna lou pi ua pikha ihih khak di kivel chet na in zang leng chih deih huai ka sa mahmah hi. (Beita)
August 21, 2020
Leave a Reply