Huan, Jesu’n a nungzuite kiang ah, Kuapeuh in ahon zuih nopleh, amah gimthuak khawk salou in, a Kros pua in honzui hen. Kuapeuh ahin humbit ut in atan dinga; kuapeuh keimah ziaka a hinna tanin a humbit ding.
– Matthai 16:24, 25.
Himahleh, pilvang un; vaihawmmite ahon mansak ding ua; kikhopna inn khawngah ahon vaw ding ua; keimah ziakin gam-ukte leh kumpipate ma ah theihpihna pe ding na hong ding diing uh. Keimah min ziakin mi tengteng huat na hiding uh; himahleh, atawp pha a thuakpa, huai mi mah tuh hotdam in a om ding.
– Mark 13:9, 13
Jesu’n a nungzuite ahon thuhilhna tuh natna, haksatna, buaina, gimthuaknate tuh ahong omding him ahi. Himahleh hiaite apan kiveng unla pumpelh un chih hon hilh ngeilou a, “huaite maituah unla phu paisuak un”, chi in hon thuhilh hi. Ahihleh ei tua gingtute lak ah, Pathian phalna in hun danga om ngeinailou khawvel a gingtute hon sawiling zou natna covid-19 i lak uah ahong om hi. Hiai natna in lam danna mahmah khat nei hi. Kilohsawn baihlamlua bang mahleh, a pawthat a, lau lawlou, mi’n hai asak simte uh a pawtpawtte sang a, a lau khinkhian, innsung tawng a kikhumte tata bang tulai tak a a vei kha a, sihna hanmual ana liam uh hitangpi sim lai hi. Khawlak a lauhhuai abat mahmah lai in, innkuan khat, nupa khat bang a vei om a khat pen in veilou chih bang leng ana om theizel hi.
Sahkhua biakna lam ah SOP i hoih zuih mahmah uh a, biaknate i khak uhi. Himahleh, khawtang lamte’n bel programme zangzang thei uh a, Park khenkhat hong uh a, mi tam pipi va hoh thou uhi. Mihing ngaihtuahna ah bel, sahkhua makai lamte Rev, Pastor, Upa chihte bitdeuh ding uh a, Public Leader lamte, politician heutu deuhte’n vei deuhding uh a, tuate asi tam deuh un teh chih theih ding bang hi. Aziak tuh Govt. thupiak SOP i zuihdan zil ua et in.
Himahleh tuadan bang hetlou in hiai natna ahong paizel hi. Ei lak ah Public leaderte sang in sahkhua heutute sukha zaw abang hi. Lauhdan a et ding hileh, Public leaderte sang in sahkhua makaite’n lau zaw, pilvang zaw abang uhi. Himahleh abitzaw tuankei uh abang hi.
Tuabang ahihna ah, mihing kiven hat a bit ahi tuankei a, natna tunga thunei Pathian mah tuh ana hi veve chih Pathian in ahihna hon taklang hizaw in ka mu hi. Tua hileh nang leh ken i ginna, i muanna koi ah i koih a? Kua tung ah i kinga a? chih i tu dinmun uah kivel chet poimawh mahmah hi. Ginna ah i omkha na hiam, Jesu ei ah a omna hiam chih kivel chetna in nei chiat ni. 2 Korinte 13:5 ah, Ginna ah na omna uh hiam chih noumau ngeingei ki-en chian zel un. Ahihkeileh, noumau ah Jesu Khrist a om chih noumau ngeingei in na thei chiankei ua hia? deihlouh na hihkei ngal uleh.
Biakna khakding hoih i sa a hiam hoih i sa kei; hoih i sakna ziak leh hoihlou i sakna ziak uh bang ahi ding? Gingtu piangthak loute adi’n tuh covid-19 natna kilohsawn ding lauh ziak a sih ding lauh ziak leh Govt. thupiak ziak ahi chih tuh i theih sa uh ahi. Huaiziak in amau tuh gen tel ngailou. Ei gingtu piangthak, Pathian sepaihte kia ahi i gen.
BIAKINN/BIAKKHAWMNA KHAK HOIH I SAKNA: Hiai in gingtu Pathian sepaih ka hihleh biakinn khak hoih ka sakna ziak Biakkhawmna ah Covid-19 hong kithehzak henla, a kha hotkhiak manlouh in Pathian in a belam hon kepsakte tampi ka khahsuah kha ding chih lungsim put nei a, Biakkhawmna khak hoihsa mah i hi na uhia? Tuabang lungsim put nei i hihleh i kikhoplouh hang in tha-it tak in i belam kepte i delh peih ding a, khawvel vai thilte programme ah i va tel hetkei ding a, i belam kepte mah in ahon muang ding uhi. Himahleh natna vei ding lauh ziak kia a, Biakkhawmna khawlsan hoihsa i hih uleh i belam kepte i awlmawh tuankei ding a, eikia i kibuaipih ding a, khalam dangtak Pathian biakkhawmna a, khalam ann lunggulhte khaktantu in i pang lel ding hi. Ei nasan leng i bah huaihuai ding a, i keu huaihuai ding a, public thil a kihel lah i khiam thei tuankei ding a, i salam lungsim in a honkai ding hi. Pathian sepaih galhang na hina hiam chih etkhiakna bang hileh nang bang na chi dia?
BIAKINN/BIAKKHAWMNA KHAKLOUH HOIH I SAK NA ZIAK: Khaklouh hoih i sakna ziak, khamangthangte veina, i belam kepte a bahkhak ding uh lauh ziak, a khalam nawitui khamlouhding uh lauh ziak ahi na hiam? Tuabang lungsim put nei a, khaklouh hoih sa i hihleh mite’ gensiat leh mite mawhsak poi i sakei ding a, Pathian’ a dinga galhang i hihna ah, Biakinn i kai theikeita zong in, innmun ah i belam kepte delhzui i tha-it mahmah ding hi. Himahleh khalam veina neiloupi a, Biakinn khak zumna leh doilokna a ngai a, kipumpei i hih khakleh bel buaina bawl dia melma setan vanzat lel i hihkhak ding a lauhuai hi. Huaiziak in tuhun tuh i ginna etkhiakna bang ana hitaleh bang i chi ding ua? chih kivelchet hun ahi. Kikhopna i neihlouh ziak a, mi tampi a bahse dingte bang chi’n i mutkuang thei dia? Nu leh pa i bahsiat ziak in i tate uh alanglang ah naupang neuchik chik nganza tep, khamtheih guk hih, gang group, chihte in a hong gahkhe panpanta uhi.
Saptuam kem belampu Pathian thaunilhte aw, Pathian’ a kem i hih ziak in, amaute nekding nawitui i pezou na uhiam? kivelthak hun ahi. Belam, a nou i khih hang in, api’n loupa zik limchi taktakte a nethei a, api agil avah nak leh anou in a nawitui akham a, a khanding a kikhiam tuankei hi. Himahleh, api i khih leh a nawizu akang a, anou i khah zan hang in, nawitui khamlou belam nou tuh nawi khamlou in a si hi.
Khalam thil ah i kikhum dap ziak in amangthang i omkha ding uam? chih dotna lianpi a hong om thei hi. Jesu’n a nungzuite kiang ah, haksatna hong tung dingte laulou a maituah ding in a thuhilh a, martyr ngen in a si uhi. Ei gingtute leng “keimah min ziak a hinna tan in a humbit dinga…” hon chi hi. Ahihleh eite hiai covid-19 ah i taksa lah damding, i kha lah damding chi tawh a nih a suahtak sawmna a pan i lakna ah i lawhching tuaktuak nading uam? Tutan ah a nih mah a zuihtouh zel lai mah hoih a patauh huai nailou ahi i chi hiam? Natna bel hiai sang a alauhuai zaw, a mulkimhuai zaw leng ahong om behbeh lai ding hi, huai tuh Pathian gensa mah leng ahi. Tua i maituah dan ah Pathian a lungkimna ding hiam? Pathian in ginglou mite’ lak ah “hiai natna tungtawn in na vak uh atang khe zou na e ” a hon chidiam? chih mimal chiat i kivelthakna ding un deihhuai i sa mahmah hi.
Leave a Reply