JESU LEMNA KUMPIPA/LENGPA ZIEHIN LEMNA IGAM UAH UMTA HEN | Rev. Dr. Hangpi Manlun

Christmas message:
JESU LEMNA KUMPIPA/LENGPA ZIEHIN LEMNA IGAM UAH UMTA HEN
– Rev.Dr. Hangpi Manlun
1).Thupatna. Awle u-le-naute aw Pa Pasian mapuina leh venbitna zieh a, tukum (2020)- Khrismas melmu thei ding a ium man in Pasian min iphat masa uhi. Tutung in ithupi ding un, ‘Jesu pien lai a Vansawlsiengte kung a van mipite lasah Tungnung pen ah Pasian thupi henlen, leitung a akipahpi mihingte lah ah, lemthu lengta hen’ (Luk 2:14) chi tungton in ikikum ding uhi. Tualeh lemna, muonna leh hamuonna chite Greek ham in ‘eirene’ a chi uhi. Thuhuntha ah 100-veibang atuong hi. Tuabanah,  lemna khu Pasian hina leh mi zie ahi a, ajiehpen, ‘Lemna Pasian’  ahijiehin ahi (Rom 15;33; Philippi 4:9). Tuabanah, apienni ilawp uh Jesu zong lemna Mangpa (Prince of peace) ahi.

          Tuaban ah, leitung ah lemna-le-muonna aumtheina ding in, UNO bang na kiphutin, theitop suo in lemna-le-muonna umtheina ding in pan ala uhi. Ahin, leitung ah lemna-le-muonna tahtah aumthei sih hi. USA President lui Jackson in, “I gam in lemna a dei a, mipite jong idei chiet ua, isolkar in jong a dei a, na presidentpu un jong kadei a, thamlouin imelma/galte nasan un jong  a dei ua, bang ding a, lemna deichiet kilem suhmai ding hina pi, hinanleh ikilemthei sih uhi” achi a agen dih mama hi. Tualeh, leitung ah lemthu lengta hen chi khu bang chiengin alawchingta diei le? Galvan a kisiem tam deudeu lemthu sangin kileplou thu khu aleng deudeu a, kileplou khu ikilepna uh hileh akilawmta hi.

2).Awleh, lemna ipoimawna uh tuomtuomte isuiding uhi:

2.i). Eima-le-eima ikilem masa ding uhi. Awle amasapen in lemna khu eima mimal hinkhuote uah apoimaw masa pen hi. Tulai mani-le-mani ikilem theilou ziehun i hinkhuo uah kipahna leh lungkimnate umlou in hamsatna leh buoina inei zing uhi. Khawvel a mijau huaipente ahi u’leh mani-le-mani kilemtheilou, tantawh a lungkimthei lou leh kingaisiete ahi uhi. Amauten mailam ah lamet ding neilou ua a kingai ziehun kingaisie un hingtah akingailou in mani-le-mani a kithat (suicide)-chite a tunlaw hi. Tuaziehin, eima-le-eima iklem theina ding un ilungtang sung uah lemna kumpipa (Jesu) piengsah va-ui, Jesu umna mun ah kipahna, hamuonna, lungkimna leh tawldamna chite a um hi.

2.ii). I nupa kal uah lemthu lengta hen. Tulai nupa tamtahte khu ikingailai un, kilungsiet sengseng kisa in “love is blind” itna a mittaw chin imizie leh ihinate zong kitheiman lou jen in ikteng paipai uhi. Ahin, ikitentah chieng un itna mittaw khu hing hah kelkulin, ka gintat na bang sih, hichibangpi na hidinglam thei leng nang toh ka kitenvotlou ding chite in ikinua hauthei leng uhi. A khente ngel lah ikingai lai un kilungsiet sengseng kisa a, nu-le-pa leh hattuom dan nangawn ngahlou jen a kigupawl jong itam uhi. Tulai zi-le-pasal kikal a kilemlouna umsahtute khu, thangsietna ziehte, kiginlelna ziehte, tanding bang kipiehlouna ziehte, sum-le-pai ziehte, leh adangdang ziehte in nupa kal ah kilemlouna apieng nuom mama hi. Tambang nupa hinkhuo nuom loutah a jang mite kung ah hing pieng ding Mangpa Jesu ziehin lemthu lengta hen chia van Angelte lasah khu atahtah in hing tangtungta hen aw.

2.iii). Innkuon sung ah lemthu lengta hen. Tulai Khristian innkuon tampite khu melmapa setan nnasep jieh a kituohlou tamtah jong iumthei uhi. A khente, kituohlouna jiehte khamthei drugs, sum-le-pai, zu-le-sate ban ah teh-le-mou kituohlou, pa-le-ta kituohlou chite in ipumdimta uhi. Tambang a hamsatna tuoh innkuonte kung ah Mangpan lemthu lengta hen ang chi hi.

2.iv). Inn sah innhangte kikal ah lemthu lengta hen.   Tulai innte kinai deudeu ahin ilungsimte uh akigamla deudeu abangta hi. Tuaban ah, duamna leh mani masielnate jieh in innsah innhangte mun-le-muol kitu amaw, kigensietttuona ziehte in kituohlouna hinkhuo ah ilutta uhi. A khente ngelin lah innkim inn pamte mun-le-muolte kehsah/lahsah lah abeisih uhi. A diehin, Lamka khuopi ah ihawhtuite un jong aluonna ding nangawn theilou khop in iumta uhi. Tamte ziehin, kinai mama a teng innsah inn hangte kikawmlou leh kihou itamta uhi. Ahin, thupilin, “Na unau na pienpi mun gamla tah aumte sang in na inn geite khu nang ading na sanggamte ahi” achi hi. A gen dih mama hi, nop-le-da tuohta lei iunau mun gamlapi aumte sang in, i innsah/innhangte khu eite hing delmasa pen dingte ahi uhi. Tuaziehin, nidanglai ipi/iputen innsah innhangte toh kituohlou sangin khuo sagi dou ding ateljaw uh a kichi hi Tuaziehin, i Mangpa Jesu hing pieng ziehin innsah/innhang kituohloute kung ah lemthu lengta hen.

2.v). Hattuom sung ah lemthu lengta hen.  Awle, hattuom khu Mangpa Jesun asisan manpha toh ang leisa leh ang tundingte ihi uhi. Tuaziehin, tahsa a kipawlkhawmna maimai ahishi a, hagaulam kipawlkhawmna mun ahilam imanghil sih ding uhi. Tuabanah, hattuom khat a umte khu akituohpente kihilouin, akituohlou teng umkhawm hilei akilawmta mawh hi. A jieh ahileh ikituohdan uh toh etin, adiehin kum 2000 nualam-in, hattuom chin teng ah kikhenna leh kituohlouna ang ha um mama hi. Melmapa setan ngei in jong hattuom chinteng kituohtah  a Manggam nna isepding uh a thangsie ahingei ding a, hattuom lien leh neute lah ah jong kituohlouna ang nasa mama hi.

        Tualeh, hattuom sung a ikituohlouna jiehte uh ahileh, lamkai kituna jiehte, mani thulou thusahlounate, be-le-phung a kihui tuomnate, lawm-le-pai akihui tuomnate, sum-le-pai deitahnate leh adangdangte jieh ahinuom mama hi. Tualeh, hattuom khat a umkhawm a kituohlou, kimuda, kihoulou chite aum mai pen i Pasian deilam uh ahisih hi. Bible in, “Na mu leh na umpi na mipi/na sapite na it theisih leh bang chin na nu mulou Van a um Pasian na it thei diei?” a chi khu imanghil sih ding uhi. Tambang a khelna/suol nnasepnate topsan in ihattuom sungte uah lemna leh muonna hing tungta hen.

2.vi). I khotang leh igam vaihawmnate uah lemthu lengta hen. Tulai ikhotang, igam vaihawmnate uh, i philanthropic organization-te lah uah nasatahin kituohlouna a nasa mama hi. Banah, itenna gam ah lemna-le-muonna nasatahin ipoimaw uhi. Tuaban ah, eite khu kawl-le-vaite bang in chi-le-nam a kikhenna nei sih nanlei jong mihausa leh a zawngte kikal ah nasatahin kidaidan alien deudeu hi. Tualeh, migentheite satan leh neh dingte jong a tang ding a kilawmten atang na uai le?. Tuabanah, vaihawmtute, milien milal leh thuneite khun ivaihawmnate uah thudih thuman toh ivaihawm na uoi le? chite kivelphat uh angai hi. I Bible in “Vaihawmna dih lui tui bang in luongta hen, dihna khu luipi kang ngailou bang in luongta hen” (Amos 5:24)- achi khu igam tahsap ahi.

3).Atopna ding in lemna leh muonna igam ua atuntheina ding in pan ilachiet ding uhi. Awle, atomkim in genta lei. i innsungte uh, ikhotang uh i politic-te uh ichidam tahtah sih ua, asudamtheipa ikultah jet un ipoimaw chiet uhi. I gensa bang un igam ua lemna-le-muonna umtheina dingin Israelte leh Pasian kikal a palai nna sem Abraham bang mi igam un ipoimaw tahzet uhi. Lemna leh muonna a umtheina ding in, koi e khat in ang pat ding hisahlouin nang-le-kei khu apanding leh asemkhietu ding ihilam manghil sih va-ui.

       Tualeh, Mangpa Jesu nei leh amutahtahte khu mite toh akilem ding uhi. Azieh ahileh Mangpa Jesu asung ua apien ban uah amutah ziehun. I Bible uah Pilat leh Herod khu Jesu mansah ding a, akipieh tuohtuoh na lam uah atopin ang kihoutheita mawh uhi. (Luk 23:12). Alamdang mama khat ahileh amaute gel apientha thu uh imusih ua, ahin Jesu lemna kumpipa akipieh tuotuona lam uah ang kihoutheita uhi. Ginglou mite bawnin Jesu a mu uh leh a kihouthei uh leh nang-le-kei Ama nei leh betute hinkhuo ah lemna hingtung in lemna palai nnasemtute ihiding uhi. Tuazehin, Mangpa Jesu lemna lengpa/kumpi hing piengpa ilopna ding uh toh kituohin ihinkhuo, igam ilei uah lemna-le-muonna hingtungta hen!!!