Lamka, October 02, 2018 ( PhualvaTimes ) : Ei Zomite’n pawi i neih lak pan thupi pen Khuado Pawi tukum (2018) in Tedim Chin Cultural Club (TCCC) sub committee makaihna in Tedim Chin Innpi (TCCC Hall) ah pawi nuamtakin kizang hi. Hih hun ah Dr. Dal Lian Haokip in hun uk (conductor) a, Kim Za Lun in thuciamteh hi.
Hun kipatma in James Lalpu leh J.M Khualno makaihna tawh mipi in TCSA Laapi (Hanlung Ciam Ni) sakna kinei hi.
Laa sak khit in Zinpipa V.Hangkhanlian (Hon’ble Minister, Agriculture Veti.& Animal Husbandry) hong tung in gate ah dak laam tawh ana kivaidawn in hall sung kilut pih hi.
Hun pat na’ngin Pastor S.Go Za Mung in hun leh vai khempeuh aapna nei hi. Tua zoh phet in N.Kham Khan Lam (Chairman,TCCC sub- com) in Zinpi, Zinmang, Khuado Pa leh a siim ding a kuan mipi khempeuh vaidawn thugenna hong nei hi. TCYA Tangnuam Unit apan Pa Vung Neng in zinpipa V.Hangkhanlian a laa phuah khum sakna leh a copy piakna nei hi. Laamvui hong laam uh a minister pu leh a innteknu zong laam pih uh hi. Pangzawl TCYA unit apan in Dak lam kilawmtak lahna hong nei uh hi. Zinpipa Minister V.Hangkhanlian in thugenna hong nei a, programme dang nei lai ahih zia zong hoihtak hong gen hi. Khuado Pa H.Pau Za Cin (president TCU) in a hun hong la in Khuado thu genna hong nei hi. Nidang lai pu-le-pa te’ zatzia leh tuhun khangthak hun ah zatzia hong gen hi. TCYA Lanva Unit khangno te-in Khangthak Laam lahna kilawmtak hong laam uh hi. Tua khit in Zinmang N.Thuam Khan Suan (MCS, SDO/BDO, Mualnuam) in thumanpha tampi genna hong nei hi. TCYA Lamka Unit apan in ngeina puante lahna hong nei uh hi, a khit phet un a minthang mahmah Khawkhai Laam lahna tawh hong zomsuak uh hi. Kham Sum Hatzaw (Secy. TCCC sub- committee) in lungdamkohna hong nei hi. Hunkhak leh pawi ann aapna Rev.T.Muan Khup in thungetna hong nei hi.
Programme hun sung in laasa siam James Lalpu, J.M Khualno leh Neunu in avangkim in laa sakna nei uh hi.
Hunzekna teng aman ciangin pawi ann Bawngsa Pok mipi’n kine hi.
Do na lingling do na lingling e,
gual in kumkhua do na lingling e
Report by : Khammung for PhualvaTimes
hih la pen zongeina khuado la hiding a hih manin zongeina dan hi leh a dawn om lai leh kilawm hong at vet vevua
a bul a hih kei leh (A) hi leh kilawm a dawn a hih kei leh (B) na hong at lai vevua leh
Thupi lua ei…
“Do na lingling do na lingling Gual in kum khua Do na lingling”