Lamka, September 4: Lamka a thiltung mengmenglou khat ah tuni in meltheihlouhte’n SBI CCPur Branch kimlak ah silence pistol hidia gintak zang in ATM a sum kikoih dek Rs. 1.15 Crore lam gumang uh chihthu om a, ATM a sum koihtupa akapliam phet un sum teng laksak in kintak in bike zang a taimang uh hidia gintak in om hi. Migiloute’n a kapliampa uh tunitaklam in Imphal paipih ahihlai in si kichi hi.
ATM a sum koihlut zelte Cash Replenishment Agency (CRA) khat apan team member Mr. Ranjan kichi in SBI main branch nuai lak ah ATM booth a sum koihzou in mundang ah vakoih nawn dek a, car sung a alutkhit lakdeuh in thautawite’n vadelh in kap uh kichi a, a kapliam khit un car sung a sum omteng laksak in taimangpih uhi.
Social Media a houlimna omte ah Meltheihlouh thautawite’n ATM a sum thuntute apan sum tamtak alaksak lai un ATM vengtu security 1 kapliam uh chih leng thudang khat om a, thil omdan diktak bangmah kitheichian nailou a, thiltun hunlai in main branch ah security guard bangzah om hiam chih leng kitheilou hi.
Sum thuntu in Tedim road a SBI main branch nuai ah ATM booth a sum a thunkhit in mundang ah thun dia pai asawm laitak in anunglam apan thautawite’n kap uh chihdan in leng thuthang om a, kapliam a om kintak in District hospital puaklut nung in Imphal ah refer uh kichi hi. Kapliam a om thakhat in kipuk mahleh huaikim a omte’n thauging zalou uh kichi a, pistol a silencer kithuah zang a kap hiding in gintakna omsak hi.
Sum tampi petmah tuahmang a omte muhkik sawm in Police ten hahtak in buaipih ua, thudot ding in mi bangzah hiam kaikhawm uh kichi hi.
(Note: Social Media a thu omte pansan a draft kibawl ahi)
Leave a Reply