PhualvaTimes interview with Thangbiaklian Hangzo, RPI(A) candidate 58-Churachandpur A/C

DONGTU: PhualvaTimes
DAWNGTU: Thangbiaklian Hangzo, Candidate 58/Ccp A/C
27/02/2017

Dotna 1: Pu, MLA omzia na hon hilhchian thei diam?
Ans:  India gam mipi kivaihawmna ah,  miteng vaihawm dia paikhawm vek theilou ihih man in, I sik-le-tang a hon ai-oh ding a  State vaihawmna innpi a I sawl pen Member of Legislative Assembly kichi hi. Legislative Assembly a member a hih dingzui un MLA te nasep ding masapen bel dan bawlna ahi. State sung a kizang ding dan/law Manipur Assembly in a pass zel ding te, Government in bill a puaklut chiang a ana velchian a, a hoihna, hoihlouhna ana sui a a poimoh bang a pan a lak ding ahi. MLA te nasep nawn pen “ensuring executive accountability” ahi. Huaibel, Government in a nasep ding bang a semna hiam chih etzui a, a sep kei leh Assembly ah questions, zero hour leh vanzat tuamtuam MLA te zatding a kibawl te tungtawn a phutzui ding ahi. Ban ah, mipite haksatna te leh mipite adia poimoh thute Assembly a tangkou leh Govt kiang a tut zel ding MLA te mohpuakna ahi. Economic,Financial leh law and order ah excutive power poimoh mah mah lentu leng ahi uh. Real politics I sai hunt a ahi.

Dotna 2: Gam-le-Nam humbitna toh kisai Manipur Hill Areas huapsung ah Tribal MLAs in bangtan ah mohpuakna anei a?
Ans:  Assembly a bill ki pass ding himhim singtang gam leh singtangmite sukha ding ahihleh HAC a refer ding chih ahi(Vide MLA(HAC) Order 1972, Clause 4(1-2). HAC ah refer hun in tribal MLA te’n ana velchet ding uh, HAC ah refer a hihkei leh Article 371(C) kalh ahih man in nialkalh ngam,doudalna aw a suah ding uh ahi.Dinmun leh Cabinet post etlah ziak a MLA hihsawm chihte bel a kipatma un mipi dikna zuakkhinsa ahi uh chihna hipah in mohpuakna a pat taise sa chihna ahi.

3 Bills toh kisai leh 7 district thak toh kisai  thil omdan I theih chiat uh, HAC a refer louh kia hilou in tutan in i MLA te kamkhat leng kalou a a om uh pen thilpoi leh zumhuai suak hi. Hichibang nasep huaise tak te khengkhia a singtang miten I tanding ‘rightful place under Indian Constitution’ leh Manipur Assembly a I dikna gending a khantouhna leh bitna palai hiding a, mipite sikden a I omna a pat kaithou ding a chouna maituah dia hong kisa kahi.

Dotna 3: Tulel dinmun et in, Manipur State Assembly Kivaihawmna ah Tribals mite a diing a National Political Party Ticket apoimohna bang om hi hiam?
Ans: Manipur singtangmite Assembly ah MLA 60 lak ah 19 ipha hi. Phaizang mite assembly ah majority  ahih ziak in lobby system poimoh mah mah hi. Huaiziak in Manipur Assembly a I deihte I puaklut chiang in hon panpihtu ding in Central Government ah I tai a ngaisek a, huaiding in National Party ticket bang a telching hile hang Central Govt ah honna makaih a, pressure honna piakpih ding poimoh hi. Huaiziak mah a Centre Govt a vaihawmna lenlel NDA a alliance partner RPI(A) ticket ana la kahi. I tribal issue pen Manipur a I zohlouh hun ale Centre a hon panpihtu hoihtak hiding in RPI (A) in Minister of State for Social Justice and Empowerment portfolio central solkal ah kinei .

Dotna 4: Ahihleh, Party zop leh Independent a telching kibatlouhna om diam?
Ans: Party zop ahih chiang in party in bye-law ahihkeileh rules/regulations ana nei a, hun tamzo ah huai va zuih ngai hi. Party discipline nuai a om ngai a, party ideology kalh a gamtat leh action lakkhum theih ahi. Independent ah bel mahni ut dandan a gamtat theih, kuamah mitmei ven ngailou. Himahleh party zop a hoihzawkna ahihleh ei chauh a pang hilou a, honna panpih ding omsa, a setup omsa om ahi a, mipite deihdan toh party deihdan a kikalh hun a mipi deihdan a pai a party I taisan ngam nak leh party zop pen a siatna om kasa kei a,  a hoihna in a hoihlouhna te zouzo in ka mu. Huaiziak mah a ken leng tutung a party ticket la kahi a, Manipur adia party thak liklek ahi a, Centre a heutute toh hoihtak a mimal tak a houlim nung a ka lak ahihman in ei thu leng paizou mahmah ding chihziak a kila ahi.

Dotna 5: Hill Areas Committee Order, 1972 ah Members (19 + 1) = 20 om uhi. India Daan Bupi Khenpi 371C-na nuai ah Special Provisions Tribal mite a di’a piak a om thuneihnate toh kituak in (Powers & Functions) bangchibang a sepkhiak na sawm a?
Ans: HAC ahih leh guardian of Manipur Hill Areas ichi thei.Hill Areas interest himhim HAC bypass ahih leh Article 371C kalh chihna hipah. Manipur Legislative khangthu a nelhsiah leh bypass a ana om nilouh pen thilpoi mah mah ahi.Article 371C a kitun thuneihna piching I hamphat pih theihna ding in, 6^th Schedule lunggulh huai pen hi. HAC in ha(teeth) honnei ding a Article 371C ahi bangtak in kizang kha thei ding, governor toh direct a kithuzak in khantouhna in mainot mah mah ding hi. Huiaziak in 6^th Schedule a kivaipuak ding thukin ahi.

Dotna 6: Hill Areas Committee in Singtang Gam huapsung ah bangtan a thuneihna nei hi hiam?
Ans : Hill area toh kisai ah HAC in thuneihna sangpen toi a Guardian of the Manipur Hill Areas himaleh heutu masa khenkhat in ‘Statutory body’ maimai ahi chia ana ngeingaihlouh uh thilpoi ahi.  ‘HAC Order, 1972 a Second Schedule’ a “Scheduled matters te ah anuai abang thuneihna leh mohpuakna nei hi :-

• Scheduled matters toh kisai himhim a sukha ding Bill te HAC ah refer ahidia, HAC in study bawl in Assembly ah report/recommendation a pe ding. Hill areas toh kisaikhakna nei bill te ah HAC recommend zat ahiding:
• Scheduled matters a subject omte toh kisai in HAC in resolution pass in Government ah dan/legislation hiam sepsuah ding (executive action) a recommend thei ding;
• HAC in Annual Financial Statement/Budget a hill areas toh kisai a discuss/kikum thei a, atuam in hill areas toh kisai a estimated receipts and expenditures te a show thei ding.
• 5 Year Plan leh Annual Plan te HAC ah refer ahiding a, hiaite final ma in Govt HAC ngaihdan a la masa ding. Hiai plan te ah Hill Areas ading atuam in Plan Schemes pulak ahiding.

Dotna 7: MLA a teelching hilechin HAC in Schedule Matters a thuneihna aneih dungzui in “Tribal Land Holding System” toh kisai bangchibang a panlak na sawm a?
Ans: Tribal land holding system mumallou tak nuai ah ikivaipuak lel hi. The Manipur (Hill Areas) Village Authority Act 1956, tutan amendment omnailou pen lui lua ta leh singtangmite poimoh/interest vengbitzou nonlou hi. MLR & LR Act 1960, singtang gam a zat ahikei ding chih hina zen pi, tutan in house patta/pucca patta, zamabandi, dakchitha ichihte hiai Act a form omte ahi a, Manipur Cabinet in a ut hun hun in Hill Areas ah gam min, mun min, sehkhen leh dan bawlkhum theihna a neih pen ‘Chieftenship’ I gam land holding system huthe in panlakna ding poimoh mah mah chih I muthei hi.

Huaiziak mah in CM/Ibobi in ‘ Land belong to the government’ ana chih lehbulhna ding in, singtang mite a ding a separate ‘Land laws’ or  ‘The Manipur (Hill Areas)Village Authority Act 1956 kichi singtangmite poimoh vengbitzou ding a amendment bawl ding ahi. Hiai a baihlam sem na ding a a dawnna tuh 6^th Schedule ah kinga hi.

Dotna 8: HAC Order, 1972 dungzui in Five Year Plan and Annual Plan Budget Hill Areas & Plain Areas ah akituam vilvel a aom diing chih himahleh tunitan huchibang aomlam kithei lou ahihman in, MLA teelching in omlechin, ‘Bangchibang a panlak na sawm a?
Ans : Tulel in Manipur annual or five year budget pen  Planning Department in a luikhiak dan dan ah kinga mawk hi. HAC in plan leh annual budget (Tribal sub-plan) a guan muhding a omngei louh pen thilpoi ahi. Thamlou, in hiai budget pen population base a allocate uh ahih man in, tullel in budget allocation ah Manipur singtanggam  34% bench mark against 35% of the total population zang ua, 1% deficit chihna hipah. Ban ah, 2011 latest census figure ah tribal population 43% vel a hisap himah leh, 34% bench mark budget allocation kizang lai pen kinelhsiahna huaisia mahmah ahi. 90% of the total land area a 34% budget allocation om ahihman in, development kichi singtang gam leh phaizang kikhai mah ahi.

Telching a om masa ten ana zuihsawmlou himhim uh hia or dinmun etlahna a mipite dikna zuak uh? 6^th Schedule mah in hiai buaina te solve zou ngei ding  hi.

Dotna 9: Local Self Government toh kisai: ‘Manipur Hill Areas’ huapsung ah “The Manipur (Hill Areas) Village Authority Act, 1956” leh Phaijang huapsung ah ‘Rural Areas’ ah “The Manipur Panchayati Raj Act, 1994” om hi ~ Dinmun kibang a ngaih/koih a om hi ngal a, ‘Bangziak a Powers & Function kikim lou a om zel hi hiam? Legislator khat hihna toh kiton in bang a na ngaihdan?
Ans : Land holding leh land rights toh kisai in Hill Area ah :

‘The Manipur (Hill Areas) Village Authority Act 1956’ leh phaizang ah

‘MLR&LR Act 1960’ ban ah, kivaipuakna toh kisai in, Hill Area ah ADC Act 1972 leh phaizang ah ‘Panchayati Raj Act 1994’ kizang in Churachandpur District ngial ah Municipality leng 1990 tan ana ki introduce ngeita hi.

Power and function ah kikimlouhna kia hilou in a zatsiamna ah leng kikhaihna lianpi om hi. The Manipur (Hill Areas) Village Authority Act 1956’ singtanggam a kizang in power etlah huai tham tunlou hi, government rights leh Hill House tax piak ding chihte a thupi pen himai. Hiai te sang a hoih zaw leh khauhzaw tham, MLR &LR Act 1960 tampi vei amendment omta pen phaizang ah kizang phatuam mahmah a, computerize land record leng Imphal  West ah zat hita in, Imphal East,Bishnupur leh Thoubal ah process pailel le hi. Hiai Act nih tegel tehkak ding chileng lei leh van ahi. Huai tuh Hill leh Valley kikhaiakna leng ahi pah ngal hi.

Panchayati Raj Act hoih mah mah in phaizang miten hamphat pih mahmah ua, power leh empowerment toh kisai grassroot level in zang thei uh suak hi. Ahih hang Constitution part nine Article 243M “Nothing in this part shall apply to schedule area” ana chih dungzui in Panchayati Raj  schedule area/tribal area ah zatding constitution in exempt hi. Hill Area pen ADC Act 1972, nuai a om ahih man in, ADC nuai a omte full power  zattheihna ding leh development leh empowerment ahibangtak a a pai theihna ding in a dawnna tuh 6^th Schedule mah ah tu veve hi.

1. Dotna 10: Hill Areas huapsung ah Hausa Inpi Vaihawmna (Village Authority) toh kisai Daan (Act) bawlphatna neih kul-le-poimoh hi in na ngaihsun hia? ~ Huchi hitaleh, aziak point 5 saang a tawmzaw lou na hon hilhthei diam?
   Ans:
   1. Hiai Act pen lui lua petmah ta, khatvei mah leng amend hinailou in singtang mite ‘Land Rights’ kembit zoulou ahih man in, amendment or separate new land law a kheng khiak a lampi omsun ahi.
2. Thuneihna, empowerment leh development grassroot level a hong kipat taktak nang in hia Act tua sang a hiamzaw ding a sekthak kul,Village Authority level a policy leh planning hong kipattheihna ding a VA  empowerement clause guanlut ding ahi.
3. Development leh fund flow system kha Nagaland te a tulel a India sung a best system hilel ahih man in, Nagaland model etton a VA empower theihna ding a hiai act revamp ding ahi.

4. Pupa dan/ customary laws te kepbitna leh huaite mah I zuihtheihna ding a I Pupa tawndan toh kituak te hiai Act sung a hellut ding ahi.

5. Dan bawl siam leh vaihawm siam a pungtheihna ding a Village Authority te dinmun etlah tham a bawl a, VA election ah khangthakte nasatak a iki hel a vaihawmna dik tundingna ding a hiai Act bawldik ding ahi.
6. Chief are the monarch/ VA are the absolute and people are its subjects chihte kiamsak a ‘Land ownership’ toh kisai a villager ten ‘neituhihna’ toh mohpuakna a lettheihna ding ua hiai Act puahphat ding ahi.

Hiaite a baihlam pen na ding in a dawnna tuh 6^th Schedule mah a kia hi.

Dotna 11:  August 31, 2015 ni a 3 Bills Manipur Legislative Assembly ah passed in om a; sitting Tribal MLAs or, HAC Members kuamah aphun-apau khat lel leng om lou uh…! MLA Candidate khat na hihna toh kiton in Nang mimal ngaihdan siangthoutak na hon gen thei diam?

Ans: Mipite dikna leh deihna gensak tu dia I telte belam mulmet bang mai a kamkhat leng ana kak louh uh, anung kum khat leh akim tan a leng kuk-e-kak e leng achihlouh ua, mipite a nungngatsanna uh a poina leh na isakna tehpihding kamuzou kei.

Hiai hun a amau a mohpuakna uh ana zou ua, ana pau hile uh kei bang tuni in MLA din ka hong kisa keihial ding. Pupa satsa I gam khotkhiak ding, bangtan zuaktou lai ding, bangtan gamhum a hinna tan Martyrs te selphou a omlai ding chih ngaingamlou a mipi sousang te ‘aw’ kazak chiang in tut maimai haksak kasa pen hi. Hiai sapna sangkeileng ei leh khangsawnte a moh pozoulou in, Jona bang a ngapi valh hihkhak ding lauhuai mahmah hi. I gam daikai ding, saltanna apat suakta a,thutak leh diktatna a vaihawmna tungding ding in,delh leng ipha lai ding. Ui si, ak si nagnon case file ahih lai in , en I ta inau site case lel leng I file zohlouh pen, thilpoi ahi.

Dotna 12: I pu-i-pa satsa Gam humbitna diing toh kisai Manipur Inpi ah mipite palai di’a sawllut a om hilechin Daan dungzui a bangtan ah panlaak theih hi in na koih a?
Ans: Innpi a mipite palai dia sawllut ka hih leh dan dungzui a hihtheihna omteng ka sui vek ding a, pan kala ngeigei ding. Adiak in Innpi sung ah gam humbitna ding toh kisai, 6^th Schedule toh kisai bang ka thugen masak penpen (maiden speech) ah ka gen ngal ding a, I martyrte tungtang genvenglou a om pen thukin ahi. Govt in pan ana laksate, alaksawmte question tungtawn in ka dong ding hi, zero hour hun ah a issue ka polut ding a, Private Members’ Bill leng a pomoh leh ka polut ding. Singtangmite gam toh kisai a issue, policy leh bills om himhim hoihtak a sui in a hoihloute kana oppose ding a, mipi palai ka hihna toh mipite toh kithuzak in amau deihdan leh deihdan loute Assembly ah kana tangkoupih zel ding. HAC Member hihna poimoh ngaih in HAC tungtawn in bang ahihkeileh ka manifesto aleng ka gensa Tribal Legislators’ Forum tungtawn in MLA dang te toh pangkhawm in gam humbitna din pan kala ding ahi.

Dotna 13: Assam State sung ah ‘Land holding system’ chithum om chihtheih ahi: Manipur State ah bel khat lel om (i.e., MLR & LR Act, 1960) hi. Hill Areas Committee 1972 akipan a om ahih ngalleh Tribal Land Holding System bawlkhiaktheih hi diing in na gingta hia? If so, Mipite Palai di’a Manipur Assembly (Inpi) ah sawllut in omlechin gam-le-nam humbitna diing in Daan toh kituak in bangtan ah panlaak na sawm a?
Ans: 6^th schedule in tunkha vek hi, hiai laihsuahna ding in chin-le-ha suang in ka pang ding a, a poimoh bang a taivial in member pihte nangon lobby ding a mansa kahi.

Dotna 14: Mipite lunggulh mahmah ‘Political Aspiration’ thu toh kisai: Daan dungzui a atuam kivaihawmna chikhat, India Daan Bupi, Art. 244A nuai a kivaihawmna ahihke’h Sixth Schedule Provision nuai a Territorial Council toh kisai, MLA na hihchiang in bangchibang a kalsuan na sawm a?
Ans: Art 244A hi’n Sixth Schedule hileh ka hihtheih bangbang in pan kala ding. Amasapen in a feasible pen, I muhtheih ding pen uh Sixth Schedule toh kisai in Assembly ah ka polut ding a, Centre Govt a uliante kimuhpih in nelhsiah a I omdan uleh 6^th Schedule a poimohdan gen in ka kipei ding ahi. 6^th Schedule a I lohchin khitchiang in huaisang a lianzo Art 244A nuai a state within state ichi hia, autonomous tribal state hia, UT hia, full Statehood hia mipi leh heututen delh tuak I saksak uh delh dia mansa kahi. Mipite palai ka hihna a kei deihdan hizo lou in mipite deihdan ah bil kadoh ding hi.

Dotna 15: Kum Zabi 21-na ah kituaklutta hinapi in mihing khosakna a thil poimoh masate (basic needs); tui-dawn, kikawmtuahna lampi, damtheihna & sianthouna, siamsinna leh meivaak chihte tunitan Zodawn ah kiningching ngah in om dek lou hi. Hiaite toh kisai na geeldan chiangtak na hon taklangh thei diam?
Ans: Hiaite pen government record ah a bukim leh kiningching in kingah khin a langtang in muhding omlou chihman thu ahi. Tu 21^st Century ah tui toh kisai a buaina a veng hun hita, himahleh eilak a ah abik in numeite in tui toh kisai a hun a senteng uh, thildang ah seng hileh nasatak in kikhangtou beh ding hi, mahni insung chiat a tui a kai hun hita ahi. Kikawmtuahna lampi, damtheihna,sianthouna, siamsinna,meivak leh essential needs te a hongpai bang bang diktak a a tuna mun ding a tun a seki leng lamkal a akiak louh ding ahi.

Nekgukna, takgukna gu huaisia i thuak lehl I hih ziak in ei leh ei kituisa buah hiam mahni phei tung a sasem toh kateh hi. Development scheme te transparent leh siangthopu tak in pai phot himhim leh I khangtou kei hiam ah endih ve ni. Ken bel mipite a ding a hongpai siki khat leng ka negu kei ding chi in kon chiam hi.

Dotna 16: Siamsinna toh kisai Manipur Hill Areas huapsung ah segawp petmah ahihdan tangpi-tangta theih ahi: Puahphat na sawm himhim hia? Ahihleh, na geeldan chiang huntawk in na hon hilhthei diam?
Ans: I siamsinna bukte loutul mahbang in, I college te taisansa mah bangta. Teacher orientation leh building renovation poimoh masa ding. Igam khangtouna leh tunung a vahawm dingte siamsinte ahih man in, top priority khat ahi.

Dotna 17: Posts & Services in Manipur for SC/ST Act, 1976 om hinazenpi a tunitan ‘Rules’ bawlkhiak a “Gazette of Manipur” ah suah (published) mai diing pen, hun paisate ah Tribal MLA kuamah in ngaihsak het lou uh hileh kilawm; Nang MLA a na hong pan chiang in bangloh diing na chi a? Hih diing a hoih na sakdan chiangtak in na hon hilh thei diam?
Ans: Contractor ten hon contract nah hun uh I sukbei hun ahita. Mipi tang a paungamlou dingte I tutkhawlsak hunta hi. Hiai Act kizang hileh tulel a Manipur gov a department tutam tuam a ST quota hukdimlouh tampi pholhsuah hong hiding, job recruitment hong omzelding ah ST te a ding in phatuam mah mah ding hi. Hiai pholhsuah a roster a poimoh bang leh a kizang ding bangte zat a hihtheihna ding in phut/panlak kul hi. Rule leh bill thak ei apt I puaksuah theih nang in, hoihtak a I ngaihsun leh 6^th Schedule mah a dawnna hi lai lai.

Dotna 18: Posts & Services toh kisai Manipur Solkal nuai ah Department teng ah Tribal Quata ahi diing bangtak a hamphatna angahtu diing diktakte kiang ah piak a om lou, baan ah phaijang mite’n hon laksuh uh ahi chih thudik ahi: Hiai toh kisai adamsakna (solution) bangchi a bawlkhiak na sawm a?
Ans: 2011 census latest update version ah Manipur ST 43% a tuat ahi, reservation toh kisai in I population toh kituak ki tangzou ngeiloi, dinmun leh portfolio toh mipite dikna zuak mang a om gige pen tutung a mipi ten I sattan ding ahi. A lui dan a pai ding maw? A thak dan a pai ding, I rights te kambit a kampau ding in..i HAICHI TANG KHEK hun ahita.

Dotna 19: Namdangte tawh kisai ah, Lamka ah leng singtangmi hilou namdang honglut tamsem ua, non-local voter leng Gangte population sang in a tamzaw ta a, patauh huai hi in na ngaihsun hia, ahihkeileh, electoral rights tungtawn a nambing poimawhtak khat hong hiding un na ngaihsun zaw hia?
Ans: Land law kitup tak i neikei, pemlut/pempot enkaina system I neikei. Vaihawmna hekkoina nuai ah I khosa. Hichibang concerned huai mah mah te gending in leh law/bill bawl ding in mipi ten I deihtelna siangthou zat hun ahita. I tenna gam mah a gamdang michih a om ding tel ding zaw zata lungel dih ve ni e!!

Dotna 20: I gam ah tulai in halhthakna chikhat hongtung in amuhtheih a, I gamsung ah nekgukna leh diktatlouhna gu thuaklah I tam ziakun mipi lamte’n leng diktatna lunggulh in, amaute palai dingte leng mi diktat mah deih uh ahi chihbang thuthang a tam a, i diktaklouh ziak ua igam uh khangtou theilou, i tate’n igam a lam-etna neilou a mundanga om, huailam alah va bit tuanlou uh, i institutions uh buaitak a om, i gam hausaknate gukkhiak leh i gam tanpha khahsuah theihding a ki-om. Kon dot nawp ahihleh, hiaite kuate ziak ahidia? Bang chi’n pan i la theih dia?
Ans: Midik kichite a daih maimai ziak ahi. Mimal mal in mahni mohpuakna a lak ding iki theihmoh bawl. Change kichi mundang a hong kipan ding hilouin “Ei’ a hong kipat ding ahi. Sense of responsible nei a, ‘zero tolertance’ to corruptor and its  associate poimoh. Responsible citizens pouhmah in Social audit kichi I mohpuakna liangzang a I ngak a I sepsuah ding ahi.

Dotna 21: MLA lawhching kichi na tehna bang ahia?
Ans: Selfless, people first. Mahni kimangilh zen a gam leh mipi a ding a kipumpiak,paukhia, dingkhia leh chihtakna toh nasem.

Dotna 22: Telching in omkei lechin, election result pen mipi deihtelna hi in na pomsiam diam? Nang chinlouh ziakin mipi adia thil poi thei, taan lawh ding a om diam?
Ans: Vote siangthou tak a akikhiat a, kitelna sukbuai ahih kei nak leh result kipahhuai muh kaki lam en. Chinglou chihpen lohsapna in kala kei, mipi thutak deih a I gilkial a dangtak te deihdan ka zahtak gige hi, mipi toh kiton in kapai veve ding a, chiklai peuh in mipi a ding in ka taise ngeikei ding.