PhualvaTimes interview with V. Hangkhanlian, BJP candidate 58-Churachandpur A/C

Q1. Pu, MLA omzia na hon hilhchian thei diam?
Dawnna: Atom a gen in India gam mipi thuneihna leh vaihawmna Dan bupi zanga kivaihawmna leh ki-ukna ahih bangin, State khat sung a dia Dan bawlna leh mipite leh gam khantouhna dia mipite sik-le-taang a vaihawmtu ahi. Huaiziakin mipite maban ding khualna taktak nei palai poimoh MLA ahi.

Q2. Gam-le-Nam humbitna toh kisai Manipur Hill Areas huapsung ah Tribal MLAs in bangtan ah mohpuakna anei a?
Dawnna: Dan in aphalsak Hill Areas Committee (HAC), Article 371 (C) in api, mawhpuakna leh Dan omte (Provision) omsate theihtel a, tua in ahuam khakdante lenkip ngam leh zang ngam hih ding tuh amohpuakna uh ahi. Dan in thuneihna leh bitna honpe mahleh ahun taka zang ngam lou leh zang theilou MLA ihihleh bitna a omtuankei.

Q3. Tulel dinmun et in, Manipur State Assembly kivaihawmna ah Tribals mite adiinga National Political Party ticket apoimohna bang om hi hiam?
Dawnna: Political party tha neih leh hat poimoh hun a hizota a, tuasaang a tuitum taka agenda deihhuailou leh deihhuai genpha hih a poimoh mahmah hun ah I om uh. Polam apan a ‘mi innsungthu’ gengen in, I deih a suk khak hak. Party liana omte House ah voice limsak leh attention piaklouh theihlouh ahihna tam.

Q4. Ahihleh, Party zopleh Independent a teelching kibatlouhna om diam?
Dawnna: Mi party zop kichi apoimoh huntaka zop a hoih mahmah, himahleh a poimohna luat omlou pi a party haatsa vazop hamham a om thou. Tuate bel chih moh man a vazopmai chih zong a om. Himahleh, election maa a Party alliances bawlsa zui a kizop tuahdan a om. Etsakna NCP leh Congress kizom, LJP leh BJP chihdan. Himahleh, Independent Era tuhun in chance aneu-a tawm mahmah a, panpihtu bei a hong hita.

Q5. Hill Area Committee Order, 1972 ah Members (19+1) = 20 om uhi. India Daan Bupi Khenpi 371C-na nuai ah Special Provisions Tribal mite a di’a piak a om thuneihna tetoh kituak in (Power & Functions) bangchibang a sepkhiak na sawm a?
Dawnna: Singtang gam sukha photphot thu-leh-la ompeuhmah, HAC a genkhawm masak teitei ding chih Centre Govt. in a bawlsa Presidential Order ahi a, tuate state in thumal khat zong akhek theikei. Tua HAC thuneihna hiaitan a huam chia a va magentheih ahi tuankei a, ahunzui a thupiangte HAC in a om bangbang pomtuak leh pomtuak lou asakte gen khawm masak a, House a piaklut ahi a mawhpuakna.

Q6. Hill Areas Committee in singtang Gam huapsung ah bangtan a thuneihna nei hi hiam?
Dawnna: Singtang Gam a HAC in athuneihna Village Authority a kipuakna leh ADC a kivaihawmna in thuneihna a neih nate chiang ahuam.

Q7. MLA a telching hilechin HAC in Schedule Matters a thuneihna aneih dungzui in “Tribal Land Holding System” toh kisai bang chibang a panlak na sawm a?
Dawnna: Tribal mite leh Land susethei ding thupeuhmah House a puaklut dia omkha a omleh, Dan dungjui in mipite bitna ding tengteng khahsuahlou a, pang dingin self-commitment kanei.

Q8. HAC Order, 1972 dungzui in Five Year Plan and Annual Plan Budget Hill Areas & Plain Areas ah aki tuam vilvel a aomdiing chih himahleh tunitan huchibang aomlam kitheilou ahihman in, MLA teelching in omlechin, Bang chibang a panlak nasawm a?
Dawnna: Tribal MLA tetawh genkhawm in amaute tawh kithukima panlak ahi kasawm. MLA/Minister khat lunglutna kia a hithei veklou ahihman in, Tribal Interestte peuhmah, Tribal MLA tetawh gen chai dimdem a, tuadan a paikhawmpih a, khenkhiaktuak Dan in aphalsa chiangchiang zatpih dia panlakpih kasawmdan ahi.

Q9. Local Self Government tawh kisai: ‘Manipur Hill Areas’ huapsung ah “The Manipur (Hill Areas) Village Authorty Act, 1956” leh phaijang huapsung ah ‘Rural Areas’ ah “The Panchayari Raj Act, 1994” om hi. Dinmun kibang a ngaih/koih a om hi ngal a, ‘Bangziak a Powers & Function kikimlou a omzel hi hiam? Legislator khat hihna toh kiton in bang a na ngaihdan?
Dawnna: Phaizang a Panchayat Local Bodyte ahihleh India Democracy Constitution January 26, 1950 apan zat ahihtak dungzui a Grass Root Level a kipuakna ahihna ah Fecility khenkhat a omzaw. Mizoram ah V.C. akipuakna tawh kibang ahi. Himahleh, ei Manipur gam a Tribalte bitna HAC nuai a Chieftainships vaihawmna ahihlai natak I bitna lah hi, lehlam ah Democracy Facility imuhtheih dingtan imuh theihlouh na ahihna zong a om.

Hiai thu hih, hih khelh khak ding ei Tribalte adia lauhuai leh khuaksen mahmah angai in kathei. Hausa (Chieftianships) sukbei a, democratic Norms a Facility taktak ineih ngamna dingin Daan in a hon humbit masak angai a, huaidan ei Manipur Tribalte Democracy nuai a VC & Sixth Schedule Pattern hoih tak mah ineih masak uh angai in kamu, tua dia lampi omthei Constitution zui a bawllem masak ahi ka tup.

Q10. Hill Areas huapsung ah Hausa Inpi  Vaihawmna (Village Authority) toh kisai Daan (Act) bawlphatna neih kul-leh-poimoh hi in na ngaihsun hia? ~ Huchi hitaleh, aziak point 5 saang a tawmzaw lou nah on hilhthei diam?
Dawnna:         Hiai ahih leh atunga ka gensa tengin genkhawm khin hi’n ka thei, aziakte:

1. India gam khangtou Democratic Country a hihna ah Chieftianships/Dictatorship ki ukna kituak zou nawnlou ahihna a om.
2. I singtang gam khantouhna dingin Grassroot level a Democracy ahong hih a, khua-le-tui neitu hihna mipite lungtanga a om ngaita hi in kamu.
3. Ki khual taka singtang gam a I te’n I giah theih na dingin apoimoh.
4. Miteng sukha – hamphatna mimal thuneihna hiloua mipi deihna leh hoihsakna banga apai theihna ding in.
5. Hiaite ataangtunna dia I bitna HAC tungtawn a omlai geigei Chieftianships Land pen alternative change omna di’n Six Schedule mah hong om masak angai a, tualou a bitna om masalou a mawk phiat pah zong hong hi thei nailou ahihna ah mipite’n zong I ngakzawh apoimoh.

Q11. August 31, 2005 ni a 3 Bills Manipur Legislative Assembly ah passed in om a; sitting Tribal MLAs or HAC Members kuamah aphun-apau khat lel leng omlou uh..! MLA Candidate khat na hihna toh kiton in Nang mimal ngaihdan siangthoutak nahon gen thei diam?
Dawnna: Hiai ahih leh kana gentam huntawk in kaki thei, atom a gen in ka mipite lung-awilouhna ding amau ma a kana theih angai a, mipite hon sawlsawl na in, kana nial ding a, ka Innzong akang kei dia, ka mite hiai ziakin si-le-liam aom kei ding kachi ngam. Aziak bel, Meitei MLA te’n amite uh (a representative people te) a zahtak uleh ken zong kei hon nei mipite kazahtak zawk ding ziakin. Ka party it zaw ding maw, ka mipite koi it zaw diing chih kei mimal decision liantak ahihman in.

Q12. I Pu-i-pa satsa Gam humbitna diing toh kisai Manipur Inpi ah mipite palai di’a sawllut a om hilechin Daan dungzui a bangtan ah panlaal theih hi in na koih a?
Dawnna:  By all possible means in.

Q13. Assam state sung ah ‘Land holding system’ chithum om chihtheih ahi: Manipur State ah bel khat lel om (I,e., MLR & LR Act, 1960) hi. Hill Areas Committee 1972 akipan a om ahih ngalleh Tribal Land Holding System bawlkhiaktheih hi diing in na gingta hia? If so, Mipite Palai di’a Manipur Assembly (Inpi) ah sawllut in omlechin gam-le-nam humbitna diing in Daan toh kituak in bangtan ah panlak na sawm a?
Dawnna: Manipur state nuai ah leng hiai dotna toh kisai in ‘Land Holding System’ chinih a om a, huaite bel:

1. MLR & LR Act, 1960 leh
2. Un-survey Hill Land under Chieftainships.

Mipi  hon represent Tribal Intellectuals and leaderte tawh kikupkhawmna neizel in, amaute hon kawkmuh dandan, Daan in aphal I hamphatna te pansan in ah kalsuan ka sawm.

Q14. Mipite lunggulh mahmah ‘Political Aspiration’ thu toh kisai. Daan dungzui a atuam kivaihawmna chikhat, India Daan Bupi, Art. 244A nuai a kivaihawmna ahihke’h Sixth Schedule Provision nuai a Territorial Council toh kisai, MLA na hihchiang in bangchibang a kalsuan na sawm a?
Dawnna:  By resolution, House Resolution leh Governor and President power a Centre Direction tan a bawltheih, panlak theih ahihna tan ah panlak ka sawm. Phaizang mite zong Manipur Integration susia hilou ahihna theih siamsak ka sawm dan ahi. North East State a Six Schedule omte zong a state siatna a omtuanlouh dante ka theih siamsak sawm hi. Aziak hon confront pahlouhna ding un.

Q15. Kum Zabi 21 na ah kituaklutta hinapi in mihing khosakna a thil poimoh masate (basic needs); tui-dawn, kikawmtuahna lampi , damtheihna & siangthouna, siamsinna leh meivaak chihte tunitan Zodawn ah kiningching ngah in om dek lou hi. Hiaite toh kisai na geeldan chiangtak na hon taklangh thei diam?
Dawnna: Hiai ahihleh alou theilou a I maban a sep ding ahi a, ka Manifesto booklet nana simkhak uleh tua ah ka gelh zouta, honna etpih un.

Q16. Siamsinna toh kisai Manipur Hill Areas huapsung ah segawp petmah ahihdan tangpi-tangta theih ahi: puahphat na sawm himhim hia? Ahihleh, na geeldan chiang huntawk in na hon hilhthei diam?
Dawnna:  Hiaizong ka Manifesto paper ah ka gelhsa leh pulaksa ahi a, honna simsak un.

Q17. Posts & Services in Manipur for SC/ST Act, 1976 om hinazenpi a tunitan “Rules” bawlkhiak a “Gazette of Manipur” ah suah (published) mai ding pen, hun paisate ah Tribal MLA kuamah in ngaihsak hetlou uh hileh kilawm; Nang MLA a na hong pan chiang in bangloh diing na chi a? Hih diing a hoih na sakdan chiangtak in nah on hilh thei diam?
Dawnna:         Hiai zong ka Manifesto ah ka na suahta.

Q18. Posts & Services toh kisai Manipur Solkal nuai ah Department teng Tribal Quota ahi diing bangtak a hamphatna angahtu diing diktakte kiang ah piak a omlou, baan ah phaizang mite’n hon laksuh uh ahi chih thudik ahi: Hiai toh kisai adamsakna (solution) bangchi a bawlkhiak na sawm a?
Dawnna:  Hiai zong ka Manifesto ah ka na suahta.

Q19.  Namdangte tawh kisai ah, Lamka ah leng singtangmi hilou namdang honglut tamsem ua, non-local voter leng Gangte population sang in a tamzaw ta a, patauh huai hi in na ngaihsun hia, ahihkeileh, electoral rights tungtawn a nambing poimawhtak khat hong hiding un na ngaihsun zaw hia?
Dawnna:  Hiai tawh kisai ahih leh Tribal leaderte leh a local self Govt. I ADCte tawh ahoih zaw diing kikup khawm a, tua dungzui a further process bawl ahoih pen diing.

Q20. I gam ah tulai in halhthakna chikhat hongtung in amuhtheih a, I gamsung ah nekgukna leh diktatlouhna gu thuaklah I tam ziakun mipi lamte’n leng diktatna lunggulh in, amaute palai dingte leng mi diktat mah deih uh ahi chihbang thuthang a tam a, I diktatlouh ziak ua igam uh khangtou theilou, I tate’n I gam a lam-etna neilou a mundanga om, huailam alah va bit tuanlou uh, I institutions uh buaitak a om, I gam hauhsaknate gukkhiak leh I gam tanpha khahsuah theihding a ki-om. Kon dot nawp ahihleh, hiaite kuate ziak ahidia? Bang chi’n pan I la theih dia?
Dawnna:  Diktatna I lunggulh uh chih non gen un, honsu thathou a, hon kipaksak mahmah. Ahi a, Saptuam makaite zong kipak un ka lam en. Mipite leh I teel MLA te’n diktatna I taksap leh I mawhpuakna akibang, khelhna neulua a omkei a, alian lua aomtuankei, khelhna leh diktatlouhna tuh koimun peuh ah ahoihna a omkei. Huaihamna sunglut neite, amihin pihte khualna neilou a, Angmasialna kia lungput a neite ziak ahih baan ah, theihna taksapnate ziak in I gam leh hauhsaknate mansuah theih ahi.

Q21. MLA lawhching kichi na tehna bang ahia?
Dawnna:  A gammite lungmuangsak, A mipite leh agam bitna tun, Ana sepsate ama ki gengen sanga mipi’n gentam zaw, mimal leh mipite’n nuntakpih leh mi manpha tawp bawlkhia a, muhtheih ding khantouhna omsakte MLA lohching ahipen di uam aw ka chi.

Q22. Telching in omkei lechin, election result pen mipi deihtelna hi in na pomsiam diam? Nang chinlouh ziak in mipi adia thil poithei, taan lawh ding a om diam?
Dawnna:  Hiai ahih leh genkholh theih luat louh, thil tungte zil a pomtheih leh huaiziak ahive chih ding hong hithei ahi. Bangteng hileh mi vangawh a thil phatuam lua ding a om in ka theikei. Omthei dia ka muh a omziak in mipite’n hon telching un. Hon telching masa un, ken mansuah omlou in mipite ka hon thuk diing.