KZP THANLON BLOCK 2019-2022 LAMKAI DIING TEELNA LEH KZP GHQS DIAMOND JUBILEE-2020 SIIMLAWHNA PROGRAMME LOHCHING TAH A ZOHSIANG IN UM
Tualbual(Thanlon), August 17,2019: Khangthah Zuun Pawl General Headquarters leh Programme Organising Sub Committee vaisaina a “KZP Thanlon Block Tunding Thahna leh KZP GHQS Diamond Jubilee-2020 Siimlawhna” programme 14th August sun leh nitah a kizang chu lohching taha zangzou in Lamka a kipan kalsuante zannitah 6:30PM in hung tung kitta uhi. SYO GHQ in Simte Inn, Simveng ah singpi-tuilum toh vaidawnna nei uhi. Program zang diingte bus khat telin four wheeler 10 te tarik 13th August 2019 ni in T Kammuanlal Simte, MCS, CEO/ADCC in a flag off hi.
Hi program ah KZP Rayburn leh Ccpur College Unit Member te leh KZP ngaina khokiim-khoziat akipan mipi tamtah tel uhi. Lamka akipankhia Registration bawl tengteng ahihleh mi 80 vaal hi. Lampi ah Leizangphai, Tallian, Thanlon kho mipiin singpi tuilum toh ahung vaaidawn uhi. Thupi akhual va, thathah ahung pe mahmah uhi.
Tarik 14th August sun hun zat hi a, KZP Thanlon Block tunding thahna neih in um hi. Thanlon area akipan khochin a kipan palai leh mipi paikhawm 100 vaal ten KZP Thanlon Block 2019-2022 sung lamkai diing telna aki nei hi. Hihun Election Commissioner B Chinmuan leh KZP GHQS Speaker Th Tuanlianpau makaih in Election neih in um hi. Mipi in lungkigual tahin hi anuai ate telching uhi.
Amaute:
President: S Minlun of Thanlon,
Vice President: P Vanlalmuan of Thanlon,
Secretary: Th Thangsanglian of Thanlon,
Asst Secretary: L Gin Johnson of Joutung
Finance Secretary-cum-Treasurer: L Ginliankhup of Thanlon,
Education Secretary: Hn Dousuanthang of Joutung.
Members:
Sanglian of Pamjal,
Thiankhomang of Sainoujang,
Ginlianlal of Leijangphai,
Lianzamang of Suangpehmun,
Th Thangkhanpau of Sumtuh,
P Tunlian John of Gamhui.
Advisers:
Th Dongchinpau, Chief of Thanlon; Th Pauchinthang, Chief of Joutung; Th Thangchinlal, Chief of Suangpehmun;
B Chinmuan, Th Kailianthang.
August 14 ni in Thanlon bial a hausate in atuah Voh tuuh 5 vaal a lian banah Pu Th Jamchinthang, EM/ADCC in atuah Bawng khat gou in mipiten Simte Sihzoupoh ankuang sawhkhawm uhi. Tuanvai mehhuan specialist ngen huan zet chu mehbel 6 akikuui naam hiau mei hi.
Nitah program Mr T. Pausianlal leh Ms Cindy Hoihneilam ten makaih uh a, Ng. Lamthianhoih in program zatna nounel tahin gelhlut hi. Nitah prog zet chu mipi Hall sung leh pua dimlet zeen in akikhawm hi. Prog patna diingin mipin KZP laa sakhawm uh a, Deacon S Muanminthang in hunte latna aneih banah Th Kailianthang Convenor, Programme Organising Sub Committee in vaaidawn thusoina nei hi. Session masa ah avangkim in Simte Zaila Awi Pawl(SZAP) ten lasa in mipi bil taisah mahmah uhi. Chief Guest Pu Th Jamchinthang Simte, EM/ADCC; Function’s President Pu T Lamminlal Simte, MCS, SDO/BDO Thanlon; Guest of Honour Pu Dr N Thangginmang, MO/PHC Thanlon; Chief Host Pu Th Dongchinpau, Chief of Thanlon, banah P Thonglianmang, President KZP GHQ, Th Pauchinthang, Chief of Joutung ten thugenna neichiat uh a, athugente un mipite lungsim zou mahmah hi. Thanlon bial Simte khosuan hausate, Special Guests, Special Invitees, kouhtuam lamkaite, KZP lamkai masate, B Khamsuansiam Ngaihte, Section Officer; huleh Colonel Manoj Sharma, Commandant 33/AR of Ainah Battalion; Captain Amit of 33/AR leh mipoimoh tuamtuam ten uap boh uhi.
Nam Laam kilawmtah KZP Rayburn Unit leh KZP Ccpur College Unit ten KZP Cultural Troupe min in Phiit Laam, Zaangta Laam te lahna nei uhi.
Lamkai masate Sunna Hun Mr H Thangkhansuan, Finance Secy cum Treasurer, KZP GHQ in makaih a minute khat mipi aki daai dide hi. Pu T Kammuanlal Simte, MCS, CEO/ADCC in a piah volley ball leh net khochin SYO Unit teng kawm ah piahkhiahna neingal boh hi. Mr S Thanggoulian, Secy., I&P, KZP GHQ makaih in Teelthah Lamkaite meellahna neih zoh in Mr Th Tuanlianpau, Speaker KZP GHQ in kichiamsahna nei a, Pastor S Khaizalal, NTBC Thanlon in latna leh haamteisahna nei boh hi.
Vice President (Internal) Mr Th Thonglunthang Simte in kipahthu soi di kilawm zousiah akip-akawi a siit umlou keeia a soizoh toh kiton in Pastor Chinminthang, UPC(NEI) in Haamteina toh hun masa khaahna nei hi.
Tutung Thanlon Programme atuam biihna leh thilthah chiamteh tham tamtah um hi. Communication Technology zaalzou in social media ah prog sung teng LIVE coverage 4G network in ki hahkhe ziahziah thei hi. Manglam a mat phahlouh Thanlon taang a prog kizangte ahun geihgeih a smart phone tawi taphot in ana muhtheih mei bangzaw….thupi diahkhol maw…!!!
Session-II(Hun Nihna): Simte Zaila Awi Pawl makaih in zaila a kisuh halhna in zuui ngal a zaan daah 11:30PM hial ahung saattouh vengvong phet in hunte chu khelah pumpum a suhtawp ahi taphot hi. Ziingkaal khua ahung vaah hialzaw Tualbual khopi a ngui tahzet ngei e!
[Thukaalzeh: Eheih! soi mangngilh ka dehtah… Pu S Paukhosoi in Thanlon taang dung-le-vaai a ana minthang pih leh tultheilou ala phuah “Gibang Khenna” chih la luang hiahhiah a ahung awih zet inchu mipite gentaahlouh inntung a kipan kawlgiit inzong thuah zoulou ahingeei diing e…tualpuang sehna in ahung kinei hial hi(a si kha leulou a apoi mahmah ve). H. Lulun Simte, Ms Ngaineikim@Lily Kim, Ms Sonkim, Ms Esther Thangsing, H Khamminlun, L Nangkhankhual te ahung kipat tahtah zet unchu mipi te toumuang thei umlou in phuur loupen pa/nu zong agei dingte keeng a tot sidup lam helou top ahi uh chihthu akiza hi. A Hagau in a mat tahtahte bangzaw stage tualpuang ah akhup-athal in ki liih ziang saam. Hehe.]
*****””
15th August 2019 zingkal in Program toh kisai suhfel diing teng saifel zou in Block lamkai teelthahte toh meeting Pa Th Kailianthang inn ah kinei a, kibulpatna diing file leh sum-le-paai President S Minlun khut ah piahkhiahna aki nei hi. Meeting zoh in KZP GHQS lamkaiten Independence Day Celebration zong va uap malam uhi.
Maban kalsuan touzel in tarik 15th Aug 2019 zingkal ann nesa in Thanlon akipan Joutung akizuan tou a, kho mipiin singpi-tuilum in hung vaidawn uhi. Khosung luut toh kiton a Rev Th Paujam in aphuah, Ng. Sonkim in siamtaha asah “Simgam Lei-Simgam Zuunni” chihla khosung Mike a hung khuang doh hiahhiahten diipnem leh bilngeh vutlou hetsih e.. Joutung Hausa Pu Th Pauchinthang in voh khat gou in nitah leh ziingkiit zingkal in ankuang hung luui den hi. Huchouh hilou in khualzinte adiing tangmaai pum thum chiat zinpaah ding hung posah malam hi. Hausa leh khosung mite zindou siamna thupi khop mei!. Etton taah zahzet!
Joutung a thaam sung in aki geen minthang Pathian Mual(1900 kuma Pu Songvung Thangsing in ana phuh), Daahmun Kawl, Penglam kiahlupna mun, Lengtonghoih Siamgatna, Lungleen Taang(nidanga baangkawl pute innmun luui), Luipi(waterfall, Tipaimukh Road gei a um) leh mun tuamtuam aki pha hi. Pathian Mual (1,555m above sea level) ah Haamteina hun P. Thonglianmang, President KZP GHQ in nei a, KZP Puanlaap humun a umden diing in akiphut hi.
Thusitna leh Kipaahthu:
Tutung I Thanlon prog hi a lohching khopmei, hichizaw deuhleh chih diing avaang hi, aziahchu ahun-amun zil a thil kisai ahihman in. A hoh ut mahmah zaalzou kha louten ngahzou tah in kumkiit Diamond Jubilee I gaaldot ngai tante. Chi leh Nam I itna, Khangthahte I khualna, I kipumkhatna, pankhawmna, kithalthuap tuahna, etc te gahsuah chu hi Program in a genchiang mahmah hi. Banah gim leh tawl khawhsa lou, sum leh paai, tha leh zung, neih leh lam, gari, neh leh taah, hun manpha taan ngam khop a ikiphalna te tuibang a munkhat-hunkhat a a hung luankhawm chiang in Thanlon KZP program lohching taha zatzoh a umthei ahihman in, Program Organising Sub Committee leh KZP GHQS ka kipaah petmah uhi. Miimal kim tungah kipahthu ka hung soi uhi. Pathian in alehtampi in hung vangpiah tahen!
Sum leh paai lamah muhna ₹2,00,000 val aki mu a, paihna lamah ₹1,90,000 vel mah aki zangbei hi(thuchian kimzaw Finance Secretary Report ah). Diamond Jubilee Celebration Committee phuhkhiahna diing in Thanlon akipan vohtal khat zong ahung kipotou malam hi.
Khaile! Unau, Siamzilna lama khantouhna kum 60 Chinna Jubilee Khuangpi-Daahpi tum diing in nang na mantaai?
Kipaah tahzet ung! KZP Damsawt Hen!
~KHANGTHAH ZUUN PAWL, GENERAL HEADQUARTERS.
Leave a Reply