Singngat ah Tunnu Bakes & Cakes Outlet hongkhia

Tuni nisim 06th November, 2019, jingkal dak 07:30 in Singngat khua a amasapen dingin, Tunnu Bakes & Cakes Outlet thak ki hongkhia hi.
Tunnu Bakes & Cakes Outlet thak ahihleh, Pu Lokendra Singh, CO, 2 Assam Rifles, Pu Haukholian, Chief of Singngat leh Pu Paukhenkhup Guite, Managing Director, Tunnu Industries ten hongkhia ua, Pastor S. Thualgouthang, EBCC SIngngat in Pathian kiaga latna leh thumsakna nei hi.
Hiai hun ah a dawr neitu, Pu Biaklun in a genna ah, “ka Pu te deihsakna ziakin hiai dawr mun hoihtak ka zang thei a, ka kipak petmah” chi hi. Tua banah, hiai banga ka lunglutna hon buchingsak Pu Paukhenkhup Guite tungah eng kipahthu ka gen chi hi.

Pu Paukhenkhup Guite, Managing Director, Tunnu Industries in a genna ah, Singngat khua leh a kiim leh kiang a ten, Tunnu Bakes & Cakes in a van bawlkhiakte Singngat khua mah a nai leh lemtang tak a mutheita ding ahihman in Outlet thak hong om pen thil kipah huai mahmah ahi, chi hi. Lamka khua a ngaina tuam a nong dawrh bangun, hiai mun ah leng ana dawr zeel un, chi hi.