Tribal Unity Day zat in om

Joint Action Committee Against Anti-Tribal Bills (JAC-AATB) makaihna in August 31, 2019 in Khuga Dam a Tribal Martyrs Park ah Tribal Unity Day zat in om a, hiai hun in Lamka leh mun tuamtuam apan singtangmite paikhawm in zahna pia uh a, August 2015 a ‘Tribal Movement’ lai a si, salpha mi 9-te suunna leh zahna piak in om hi.

 Manipur Legislative Assembly ah August 31, 2015 in Bill 3 pass in om a, huaite – The Protection of Manipur Peoples Bill, 2015; The Manipur Land Revenue & Land Reforms (Seventh Amendment) Bill, 2015 leh The Manipur Shops and Establishments (Second Amendment) Bill, 2015 ahihleh singtangmite ading a hoihlou a theih ahihziak in Lamka telin Churachandpur district ah mipi’n kiphinna tawh dal uhi.

August 31 nitak apan ni 3 sung in security force tawh kinawktuahna ah mi 9 si uh a, amaute – Enkhankhup Suante (19) of L.V. Lane, New Lamka; Lamkhenthang (43) of Lower Chapellane; Pausuanlian (18) of Vengnuam, New Lamka; Thangzalian (30) of Hiangtam Lamka; H.Paulianmang (22) of Dorcas Veng, New Lamka; Robert Zamminthang Valte (27) College Veng, New Lamka; Khamsianmuan (22) of Vengkhang, Pearsonmun; Khaizamang Touthang (11) of Bijang leh Henlalson Gangte (19) of Headquarter Veng hi uhi.

Manipur singtangmite’ ading a hoihlou leh lauhuai ding bill pass ziak a kiphinna om hunsung in CCpur district ah singtangmi 9 si uh a, ni 632 sung kiphinna om nung in Manipur Govt. leh JAC-AATB kal ah kihoulemna om in Memorandum of Understanding (MoU) bawl hi a, huai dungzui in May 24, 2017 in Martyr-te’ luang vuikhiak in om hi. JAC-AATB in August 31 pen “Tribal Unity Day” in puang a, huai nung in kumteng in Lamka ah Tribal Unity Day kizangtou hi.