Zomi Leh Zogam Kizopna Apat Zomite’ Taaksap Awnghuk Zia Leh Pathian Thu Poimoh Zia
Gelhtu- Lamjoylian Mangte
1.ZOMI LEH ZOGAM THUMAL HILHCHETNA.
Zomi te’n Zomi khangthu chiamtehna diktak neikei mahleh, aluahna gam uah amau-le-amau kitheihchetna neitek uhi. Zomi te tenna Zogam in tulai a Burma a Chin tanggam, Mizoram, Cachar lak ah mun khat leh Manipur a taanggam avek a gawm 30,000 sqaure miles vel ding a lian luah uhi. Zomi te ahihleh Mongolian chi suan te lak ah khat hi uhi. Zomi milip maktaduai 2 pha di’a gintak in om hi. Amaute nam 44 kigawm khawm in Zomi kichi uhi. Tua nam 44 lak ah Manipur apat Lushei, Gangte, Vaiphei, Simte, Zou, Hmar, Pawi, Lakher, Thadou (tua Kukis), Paite leh Sukte teng uhi.
2.ZOMI TE GAM (ZOGAM) MUHDAN LEH THEIHDAN.
Nam dang te apat Zomi te tuamna khat ahihleh atenna gam (Zogam) toh lungsim, taksa, leh hinna a kizopna thuuktak aneih uh ahi. Zogam in Zomi te hihna leh khangthu kembit a, tua ban ah, neek-le-taak muhna ding mimal lungkham saklou hi. Vice President of the World Council of Indigenous Peoples thugen in Zomi leh Zogam kizopna dinmun chiangtak in gen hi,“tribal te ading in lei (earth)pen kingakna bulpipen ahi. Khalam Khanna ding a tutpha, kampau leh tawndan te khangkhiatna ahi. Lei ahihleh amau ading in khangthu leh asung a thiltungte kembittu leh pupa te guh bang hi. Lei in ann, damdawi, tenna ding, leh niik-leh-puan te pia hi. Huaziak in lei suksiat louh a, kithutuak tak a hing pih ding ahi.” Huchi ahihlai in, gam tungtang ah Zomi te thuneihna deihgoh in namdang te’n thuneihna zang in laksuk sawmna om lellel hi. Zomi te gam pen khantouhna gelkholhna thilte min suanlam a nei in namdang (non-tribal) te’n etkhiakna nei in dam, reserved area, leh wild life sanctuaries ding in Zogam suam in omta hi. Dr. David Vumlallian Zou in hichi’n gen hi “tribal gam tung ah kituhna pen gam sung tan hilou a khovel buaipih khat suak hi. Tunaizek a thu kimu dan in Zomi te’n atenna gam tungtang ah khotang neitu hihna mangsak hiaihiai ua, ut-le-dah a gam khuallou a zatna tungsak . Hiai bang dinmun pen Nepal mi ten ana thuak ngei uhi. 1957 in Nepal gam pen khotang gam apat state khat gou di’n gam thunei te’n khek uhi. Hilele, 1972 in khotang in gam neitu hihna len in gam etkaina nei thak uhi.”
3.ZOMI TE HINKHUA AH GAM (ZOGAM) IN NAA ASEPDAN.
Zogam in Zomi te hinkhua ah naa nakpi in sem hi. Hiai ah, Gam in Zomi te hinkhua politically, economically, socially, leh religiously tungtawn apat suk khak a om ahihdan ensuk ni.
3.1-Politically:
Zomi te’n Pu-Pa khang apat in Gam humbit in namdang te apat in si-le-sa seng in pan ana la uhi. Huai hunlai in hausa pa leh hausa khawnbawl te thuneihna nuai ah khota khat mahni in kivaihawm ua, ki ukna ana om tek hi. Hausa pa in Gam leh dan thuneihna lam ah thuneihna nei a, aman gammi te hindan enkai hi. Zomi te lak ah tawndan a gam neihtheih dan kingakna pen hausa leh hausa khawnbawl te lamkaihna tungtawn in khotang milip in hamphat pih uhi. Tawndan dungzui in Zomi te agam uah zaleen takin ana ki uk uhi. Hiai bang zalennna gamsung ah Zomi te’n kituaktak in namdangte sukkhak louh in ana teng khawm uhi.
3.2-Economically:
Zomi te’n Gam ah nek-le-taak zongna ding in lou bawl uhi. Tua ban ah, Kum teng in lei hoihna deih ziak in lou neihna khekkhek uhi. Zogam ahihleh sing aat theih man tampipi leh gua sum a khektheih omte ziak in hausa mahmah a, niteng-hunteng a Zomi te poimoh Gam in zaleen takin pia hi.
3.3- Socially:
Zogam ah, British te hong lutma in Zomi te kuamah thuneihna nuai ah omlou in teeng khawm tek uhi. Namdang te khoihkkhak leh ukna nuai ah Zomi te omlou ua, agam uh inchi khat zong khahsuah lou uhi. Zogam sung ah, Zomi te zuihdan, tawndan, hing dan; kampau leh khotang hinkhua ah nei in zaleentak in ana nungta khawm uhi.
3.4-Religiously:
Nidanglai in ahihleh Zomi te’n singbul-suanbul ana bia uhi. Amau te’n, Pathian pen thilsiam nalh taktak suang lianpi, kohawm, singkung, leh tuisampuak nalh taktak te apat in bia uhi. Huchi ahihlai in kha gilou damlouhna leh vangsiatna tungsak thei achihziak un lau mahmah ua, amaute lungkim sak sawm in Zomi te’n kithoihna saizel uhi. Zomi te’n huai hunlai in pathian taklou be mahle uh, amau gam sung ah zaleen tak in be thei uhi.
4.TULEL DINMUN A ZOMI LEH ZOGAM (GAM) KIZOPNA.
British te hong lutma ua, Phaizaang gam neihdan tungtang pe’n Meitei kumpi in ana thuneihkhum hi. British te hong ua, Manipur gamgi khenna om hi. Zomi te tenna ahihleh namdang te khoihkhak louh ding in dan in thuneihkhum hi. British official te’n phaizaang ah Regular and Revenue System ana zuun ua, himahleh Zomi te tenna ah, land tax chih himhim ana zanglou uhi. Land tax tang in hill house tax ana zuun uhi. Hiai hill house tax ahihleh Zomi te’n Rs. 2 lakvel chouh pia uhi. Phaizaang ah Patta system akizatlai in, Zomi te tenna ah patta system (gam tangtheihna) kichi dan ana omlou hi. Tullel in, Zomi te ahihleh dan ziak in phaizaang mite toh kibanglou in Manipur dan etkaina nuai ah humbit in om uhi. (Constitution of Manipur, 1947, Manipur Land Revenue and Land Reformed Act, 1960, Article 371 (c) of the Indian Constitution read with the power conferred by V.V Giri in an extraordinary gazette of India on 20th June 1972, enactment of Autonomous District Council 1972.) Hiai dan dungzui in tribal MLA 19s te kigawmna Hill Area Committee (H.A.C) te thuneihna leh mohpuakna in Manipur ah Zomi te gam humbit in om hi. Huchi ahihlai in, tribal dan bawltu te’n political bose te apat deihsakna khahsuah ding alauhziak un, H.A.C ahi ding bangtak in pailou leh nasem lou hi. Huaiziak in, H.A.C te hatlouhna lemchang a la in Manipur Assembly in anti-tribal bills thum (3) 31st August 2015 in hon passed a, hiai in Zomi te omna gamteng ah mipi helna leh kiphinna piangsak hi. Hiai bill deihlouhna ziak a kiphin te lak ah mi 9 in hinna mansuah loh uhi.
Manipur in 1972 a kivaipuak theihna angah apat in Zomi te gam deihgohna ziak a Manipur ah namdang te’n Zomi te hamphatna te tuh gige uhi. Tullel in Meeteis/Meitei te’n nam mawl ka hi uh chi phing in India gam ah ST list khat hi di’a pan nasatak mai in la uhi. Tomlam in genle, Meitei te’n, ST list hihtheihna a apoimoh teng nei uh ahihdan puang ua, himahleh India dan tehna dan in tehkha lou uhi. Huai bel, ST lak a khat hihtheihna ding a poimoh ahihleh tullel dinmun nam mawl a kithei te ahi hi. India in ST list a telthei dite nam khat background (pu-pa hunlai dinmun) apat tehlou ua, tullel dinmun apat in teh uhi. Huaiziak in Meitei te’n anget uh ST a guanglut ding chih pen amau kia hilou a India gamsung a nam lianpen leh thupipen tele hithei ding chihna suak hi (amau ngaihdan apat in). Hiai pen India dan apat hitheilou hi. Aziak bel, Scheduled Tribe ah om nam khat pen kum 10 sung ading ahi. Kum 10 sung ST ah om nam mawl khat in nam changkang te dinmun aphak zohkei leh aban kum 10 mah ST list ah om ding a behlap hizel hi. Huchi hilou a Nam changkangte bang a khantouhna aneih ualeh ST list apat koihkhiat hi uhi. STDCM (Meitei te’n) angiat uh ST pen reservation leh hamphatna tuam tuam ziak hilou a constitutional act ahi chi uhi. Hilele, amau kampau sang khel ua, a motive (guktup) te uh khangthu apat phaizaang leh taangam kikal thiltung omte ah theihtheih hi. Chief Minister lui in dotna hichi’n bawl ngei hi, “taanggam ah ei te’n gam ilei theikei ua, himahleh tribal te zaleen takin phaizang ah teng uh”. Hichibang te ziak in, suangtuahna apat chiang mahmah tuh phaizang mite’n taanggam zaleen tak a aneih theihna ding un pan lak theih dandan in la uhi. Huaiziak in Manipur a Tribal te’n Meitei te ST ngiat uh awilou ua, dal-le-nang uhi. Aziak bel Zogam (gam) pen Zomi te ading in reservation ding kia hilou in Gam in Zomi te hihna pua hi.
5.ZOMI LEH GAM (ZOGAM) KIZOPNA PATHIAN THU APAT DAWNNA.
Laisiangthou in Israel namte atelziak pen namdang te lak ah Pathian tup-le-ngim semkhe ding ahi. Ban ah, Laisiangthou in Pathian leh Israel te kizopna pen aziak omlou ahihdan puangzak lai hi. Huchi hitamahleh, Israel te’n Pathian tel nasan te pialsan in thumanglou ua, Pathian tung ah hel uhi. Huaiziak in Pathian in Israel te taisan hi. Ginglou nam te’n Israel mite hong thuneih khum ua, Israel gam suksiat in om hi (Jer. 2:15). Isael te amau gam apat in kithehdalh leh mangthang ding in pi in om uhi. Huai takin, Pathian ading a theihpihtu hihna leh namdang te ading a vualzawlna hihna khahsuah/mansuah uhi. Huchi mahbang in politically, economically, religiously, socially hinkhu ah Gingloute vaihawmna leh thuneihna nuai ah om hi uhi. Israel te’n Pathian abiak ut bang ua biakna pethei nonlou ua, mite vanzat ding kia in koih in om uhi (Jer. 2:14).
Kum 108 bang Zomi te Christian hita uhi. Zogam ah tangthupha puaktute kipahpihna aomlai in Zomi te mangngilh louh ding bel Pathian pen Zomi te khang ah kingakna bul pipen ahih gige ding ahi. Hilele, tulel a Zomi te dinmun pen, moral, political, economical, spiritual lam ah keniam mahmah mai hi. Hiai kiakniamna pen Israel te bang a Pathian thumanglouhna ziak leh helna ziak ahi hi. Zomi te Pathian tung ah helna kilatkhiaatna bel, Pathian deihbang a Zomi te hinglou, heutute’n vaihawmlou hi. Huaiziak in Zomi te lak ah kituahna omlou in mahni hamphatna leh kiletsakna ziak in kingiik tuahna om hi. Mahni deihbang leh utbang a hing leh vaihawmna in Pathian thangpaihna Zogam ah Israelte tung ah atung bang a tung ding lauhuai mahmah hi. Gam leh Zomi te dinmun veina leh awlmohna te ziak in Heutute, Nute, leh Tuailai “Agam leh Adiktakna zong masa ding” chi’n panla kibehlap zelzel hi. Pathian deihbang a Zomi te’n hinkhua zattheihna ding un, 21st March, 2019 in Zomi Nampi Maitam min in Zomi te tenna mun tuamtuam ah Pathian buanna kisikna leh ki-apkhiatna neih in om hi. Israel te Pathian tung ah thumanglouhna leh helna te ziak a apuk bang ua, Pathian’ thumanna leh lauhna ziak in Zomi te lak ah halhthakna hong tun ding a, Zomi leh Zogam khalam leh salam ah humbit in om ding hi. 2 Khangtangthubute 7:14, “ka mina kilou ka mite kingainiama a thuum ua, ka maitang a zon ua, a gamtat giloute uh a kiheisan uleh, vaantung apan in ka na za ding a, a khelhna uh ka ngaidam ding a, a gam uh ka damask ding.”
ARTICLE TANCHIN SUIZUINA (BIBLIOGRAPHY)
Dena, Lal., “Historical Perspective of the process of marginalization: A STUDY OF THE HILL PEOPLE’S EXPERIENCE IN MANIPUR” in 60th Zomi Nam Ni Celebration Committee, Prism of the Zo People, Central Lamka: ThawnSaau Printing Works, 2008.
Gougin, T., Discovery of Zoland, Churachandpur: Zomi Press, 1984.
Gougin, T., History of Zomi, Churachandpur: Zomi Press, 1984.
Ngaihte, S. Khamzalian and Others (eds), The Indigenous Zomi, Lamka: Zomi Human Rights Foundation, Hqtrs, 2005.
Ngul Khan Pau, J.M., “Blessed Nation” in 60th Zomi Nam Ni Celebration Committee, Prism of the Zo people.
Shatsang, Vareiyo., “Ground of Justification for standing against the STDCM demand for inclusion of Meeteis/Meiteis in the ST list of India.” The Sangai Express, Imphal edn, 20 March, 2019, 2.
Suantak, Joseph., Chin+Kuki+Zo; Genesis & Exodus, Guwahati: Akansa Publishing House, 2012.
Vumson, Zo History, Mizoram: Author, [no year].
Leave a Reply